Ministériu Edukasaun, hafoin halo diálogu ho reprezentante eis-profesór sira ne’ebé kontratadu iha tinan 2023, iha loron 6 fulan-fevereiru tinan 2025, hato’o katak sei hala’o Teste Espesiál ida, ne’ebé sei fó oportunidade ba sira atu tama iha sistema ensinu nasionál, tuir kritériu sira ne’ebé estabelese ona iha Dekretu-Lei n. 31/2023, loron 31 fulan-maiu.

Teste ida-ne’e sei hala’o de’it ba eis-profesór sira ne’ebé kontrata ona iha 2023 ne’ebé prienxe rekizitu atu tama iha karreira dosente nian. Iha inísiu, sei hala’o ba Ensinu Sekundáriu Jerál no Tékniku-Vokasionál, tuir mai aplikasaun ba Ensinu Báziku, tuir nesesidades.

Atu apoia kandidatu sira iha sira-nia preparasaun, Ministériu Edukasaun sei fornese matrix estudu nian ida ho konteúdu ne’ebé kobre iha ezame, nune’e kandidatu sira bele prepara no hetan rezultadu ne’ebé di’ak no tama iha karreira dosente. 

Ministériu Edukasaun mós sei analiza solusaun alternativa ba eis-profesór sira ne’ebé la prienxe rekizitu ba Teste Espesiál, liuliu sira ne’ebé iha de’it diploma ensinu sekundáriu nian.

Iha 2024, hala’o ona teste faze rua nian ba Bolsa Kandidatu Profesores, ne’ebé aprova ona Antigu Profesór Kontratadu sira hamutuk na’in-200 hosi tinan 2023.

Iha serimónia abertura teste eskritu eletróniku ba Bolsa Kandidatu Profesores, Ministra Edukasaun destaka katak Governu iha ona kompromisu atu promove kualidade edukasaun iha Timor-Leste, ida-ne’e nu’udar prioridade husi Programa Governu Konstitusionál IX no elementu fundamentál ida ba dezenvolvimentu nasionál. Nia subliña mós katak kualidade edukasaun depende ba profesór sira ne’ebé kualifikadu no dedikadu hodi inspira no motiva estudante sira. 

 Ministériu Edukasaun mós apela ba eis-profesór kontratadu tinan 2023 nian ne’ebé la partisipa iha teste anteriór sira atu aproveita biban ida-ne’e, atu nune’e bele kontribui ba harii sistema edukasaun ida ne’ebé kualifikadu no sustentavel liu ba jerasaun sira iha futura.