Ministru Prezidénsia Konsellu Ministrus no Interlokutór iha diskusaun Greater Sunrise, Agio Pereira, iha loron 4 fulan-fevereiru tinan 2025, hala’o sorumutu iha Palásiu Governu, ho reprezentante hosi empreza petrolífera japoneza INPEX iha Timor-Leste, Yosuke Ueda , ho nia ekipa, hodi kontinua hala’o diálogu estratéjiku kona-ba dezenvolvimentu Projetu Greater Sunrise no oportunidade dezenvolvimentu iha Kosta Súl (Tasi Mane) Timor-Leste. 

Iha sorumutu ne’e, reprezentante INPEX hato’o votu Tinan Foun ne’ebé prósperu no agradese ba Prezidénsia Konsellu Ministrus nia apoiu durante tinan anteriór tomak, no konsidera katak, empreza ne’e loke ona eskritóriu iha Timor-Leste iha fulan-juñu tinan kotuk. Empreza ne’e reafirma nia interese atu partisipa iha dezenvolvimentu Projetu Greater Sunrise, no diskute ona pontu situasaun / estatutu projetu nian. 

Ministru Agio Pereira reafirma katak Timor-Leste nakloke atu kolabora ho empreza internasionál sira hodi implementa Projetu Greater Sunrise, no subliña katak adezaun  país nian ba ASEAN sei hametin diálogu ho Estadu-membru sira-seluk no habelar oportunidades ba dezenvolvimentu ekonómiku.

Reprezentante INPEX destaka kapasidade no infraestrutura empreza nian, inklui instalasaun likifisaun  gás  ‘onshore’ ‘Ichthys LNG nian, iha Darwin, no empresa interese atu kontribui ba dezenvolvimentu Greater Sunrise nian. 

Sorumutu ne’e taka ho kompromisu husi país rua hodi mantein diálogu nakloke no esplora oportunidades iha futuru ba kolaborasaun iha ámbitu projetu nian.