Ministériu Negósius Estranjeirus no Kooperasaun ofisiálmente inaugura edisaun daruak husi programa Futuru Lider Ba ASEAN (FLBA), iha serimónia ida ne’ebé hala’o iha loron 4 fulan-fevereiru tinan 2025, iha Dili. Durante eventu ne’e, entrega mós sertifikadus ba partisipantes na’in-68 ne’ebé remata ona ho susesu edisaun dahuluk programa durante tinan ida nian.

Programa FLBA, finansia husi Governu Timor-Leste no implementa iha Ministrus Negósius Estranjeirus no Kooperasaun nia okos, hanesan projetu estratéjiku ida ho durasaun fulan 12 ne’ebé ho objetivu atu kapasita líder foin-sa’e sira ho formasaun iha lideransa, esperiénsias kle’an iha país sira ASEAN nian no projetus aprendizajen iha asaun ba dezenvolvimentu estratéjiku Timor-Leste. Síklu daruak husi FLBA, ne’ebé daudaun ne’e hahú sei hetan partisipasaun husi foin-sa’e timoroan na’in-110.

Ministru Negósius Estranjeirus no Kooperasaun, Bendito dos Santos Freitas, iha abertura ba eventu ne’e, destaka katak “okaziaun ida-ne’e marka kontributu  signifikativu ida ba perkursu ita-nia nasaun nian hodi integra iha ASEAN no ba kontrusaun nasaun”. 

Ba “lideres foun FLBA”, Ministru hateten katak “sira hahú hela jornada transformadora ida ne’ebé sei ekipa sira ho kompeténsias, koñesimentus no redes nesesária hodi lidera ita-nia nasaun iha era foun ida kooperasaun rejionál no envolvimentu globál nian”. Nia husu mós ba sira atu hanoin hikas “katak, hanesan futurus líderes ASEAN nian, sira sei reprezenta Timor-Leste la’os de’it iha ita-nia bloku rejionál nia laran, maibé mós iha komunidade globál nasaun sira nian, atu nune’e hatudu nasaun nia potensiál, valór no aspirasaun sira ba mundu”.

Iha ninia intervensaun, Ministru sita Primeiru-Ministru, Kay Rala Xanana Gusmão nia liafuan, uaihira lansa edisaun dahuluk husi programa ne’e: “Dezenvolvimentu Timor-Leste nian depende, liu fali uluk, husi ita-nia rekursus umanus no aproveitamentu ita-nia potensiál. Tanba ne’e, ita investe iha jerasaun líderes tuirmai”. Primeiru-Ministru subliña mós katak “investe iha futurus líderes sei ajuda ita-nia país atu hasoru dezafius globál, promove inovasaun no kontribui ba futuru ida ne’ebé sustentavel no prósperu”. 

Vise-Ministra ba Asuntus ASEAN, Milena Maria da Costa Rangel reforsa katak programa FLBA hanesan inisiativa ida husi Ministériu Negósius Estranjeirus no Kooperasaun hodi hasa’e kapasidade foin-sa’e timoroan sira hodi partisipa ativa iha ASEAN. “FLBA la hola parte iha rekizitus roteiru ba adezaun ne’ebé fornese husi ASEAN, maibé hanesan Ministériu nia kompromisu ida atu garante katak Timor-Leste preparadu atu integra totalmente iha komunidade rejionál”, nia hateten.

Governu Konstitusionál IX, to’o ninia mandatu ikus iha objetivu atu kapasita jovens to’o 500 liuhusi programa ida-ne’e, promove sira-nia kompriensaun kona-ba ASEAN no sira-nia partisipasaun ativa iha integrasaun rejionál. 

Serimónia ne’e marka prezensa husi Vise-Primeiru-Ministru, Ministru Koordenadór Asuntus Sosiais no Ministru Dezenvolvimentu Rurál no Habitasaun Komunitária, Mariano Assanami Sabino, Ministru Transportes no Komunikasoins Miguel Marques Gonçalves Manetelu, Ministru Joventude, Desportu, Arte no Kultura Nelyo Isaac Sarmento no reprezentantes korpu diplomátiku.