Gabinete Vise-Ministra ba Asuntu ASEAN, iha loron 27 fulan-janeiru tinan 2025, hala’o sesaun indusaun ba kandidatus ne’ebé aprova ona ba programa Grupu Daruak ba Futuru Líder ASEAN nian (FLBA- Futuru Líder ASEAN). 
Iha nia diskursu abertura sesaun nian, Vise-Ministra Asuntu ASEAN Milena Rangel destaka importante atu investe iha futuru líder hodi kontribui ba Timor-Leste nia adezaun ba ASEAN, ba dezenvolvimentu nasionál no estabilidade rejionál.
Programa FLBA ne’e, finansia husi Governu Timor-Leste no implementa iha Ministériu Negósiu Estranjeiru no Kooperasaun nia okos, nu’udar projetu estratéjiku ida durante fulan 12, ho nia objetivu atu kapasita líder foin-sa’e sira ho formasaun lideransa, esperiénsia imersaun iha país sira ASEAN nian no projetus aprendizajen asaun ba dezenvolvimentu estratéjiku Timor-Leste nian.
Iha edisaun daruak programa nian, kuaze joven na’in-500, ho idade husi 23 to’o 37 no hosi setór oioin — públiku, privadu, sosiedade sivil no akadémiku — aprezenta sira-nia kandidatura. Prosesu selesaun ne’ebé rigorozu rezulta partisipante nain 100 maka hetan aprovasaun, no asegura balansu jéneru (50% feto no 50% mane) no reprezentante husi setór hotu-hotu. 
Sesaun indusaun ne’e marka inísiu husi perkursu ida ne’ebé inklui formasaun lideransa intensiva, workshop/sorumutu sira, esperiénsia imersaun loron 10 iha país ASEAN ida no kontinuasaun ba projetu aprendizajen ne’ebé hala’o hela. Projetu sira ne’e, ne’ebé hahú iha edisaun dahuluk, ho objetivu atu oferese solusaun inovadora ba dezafiu sira ne’ebé Timor-Leste hasoru.
Prevee mós katak edisaun daruak hosi programa ne’e nian formalmente sei lansa iha inísiu fulan-fevereiru tinan 2025, ho eventu ida ne’ebé sei inklui mós entrega sertifikadu ba partisipante sira hosi edisaun dahuluk nian.
Primeiru-Ministru Kay Rala Xanana Gusmão, bainhira lansa edisaun dahuluk hosi programa ne’e, destaka katak “dezenvolvimentu Timor-Leste nian dependente, liu fali uluk, ba ita-nia rekursus umanus no kapasitasaun/ dezenvolvimentu ba ita-nia potensiál umanu. Tanba ne’e maka ita investe iha jerasaun lider sira tuirmai.” 
