Vise-Ministra ba Asuntu ASEAN, Milena Rangel, akompaña Prezidente Repúblika, José Ramos-Horta, iha Enkontru Anuál Fórum Ekonómiku Mundiál 2025, ne’ebé hala’o iha Davos, Suisa, iha loron 20 to’o 24 fulan-janeiru. Eventu ne’e halibur líder mundiál sira hodi diskute dezafiu internasionál no rejionál sira, ho tema “Kolaborasaun ba Era Intelijente”, hodi destaka importánsia kooperasaun multilaterál no inovasaun teknolójika. 

Durante eventu hala’o, Vise-Ministru akompaña Prezidente iha sesaun sira iha nivel altu, enkontru bilaterál sira no kompromisu diplomátiku sira, inklui sesaun  “Navegasaun husi Pontus Krítiku Ázia nian”, iha ne’ebé Prezidente Ramos-Horta, nu’udar oradór, fahe perspetiva kona-ba seguransa rejionál no estratéjia sira atu prevene eskalasaun konflitu iha Ázia-Pasífiku, iha kontestu dinámika podér ne’ebé kontinua iha mudansa no interese diverjente sira.

Vise-Ministru akompaña Xefe Estadu iha enkontru bilaterál importante sira ne’ebé hametin Timor-Leste nia kooperasaun ho parseiru estratéjiku sira:

• Tony Blair, eis-Primeiru-Ministru Reinu Unidu, hodi ko’alia kona-ba Institutu Tony Blair nia apoiu ba reforsu institusionál iha Timor-Leste; 

• Kao Kim Hourn, Sekretáriu-Jerál ASEAN, hodi ko’alia kona-ba Timor-Leste nia progresu adezaun tomak ba organizasaun ne’e no ninia vizaun ba ASEAN 2045;
• Julie Bishop, Reprezentante Espesiál ONU ba Myanmar, hodi koordena esforsu sira hodi rezolve krize iha nasaun ne’e;
• Paulo Rangel, Ministru Estadu no Negósiu Estranjeiru Portugál, no Maria Graça Carvalho, Ministra Ambiente no Enerjia Portugál nian, hodi hametin kooperasaun diplomátika no ambientál entre Timor-Leste no Portugál

Enkontru bilaterál sira seluk inklui: 

• Ngozi Okonjo-Iweala, Diretora-Jerál OMK, hodi diskute aliñamentu polítika nasionál Timor-Leste tuir padraun organizasaun ne’e nian;
• Amy Pope, Diretora-Jerál IOM, atu rezolve dezafiu globál sira iha jestaun fluksu migrasaun nian;
• Prínsipe Faisal bin Farhan bin Abdullah Al Saud, Ministru Negósius Estranjeirus Arábia Saudita, hodi esplora oportunidades iha kooperasaun bilaterál;
• Hassan Sheikh Mohamud, Prezidente Somália, hanesan parte ida hosi kolaborasaun iha g7+.

Aleinde enkontru bilaterál sira, Vise-Ministra partisipa iha sesaun temátika sira ne’ebé relevante tebes:

• Perspetiva Ekonómika Amérika Latina, ne’ebé esplora maneira sira atu aproveita rekursu naturál sira, kapitál umanu no teknolojia hodi promove produtividade no dezenvolvimentu sosiál;
• ASEAN: Hamutuk Ita Forte Liután, ne’ebé destaka valorizasaun ba diversidade no kolaborasaun hodi konsolida ASEAN nu’udar bloku populasaun globál datoluk boot liu; 
• Intelijénsia Jerál Artifisiál (AGI), ne’ebé analiza benefísiu no risku sira ne’ebé asosiadu ho AGI, hanesan lakon serbisu, vijilánsia, no dezafiu sira hosi “deepfakes”.