Ministru Prezidénsia Konsellu Ministrus, Agio Pereira, ohin, loron 21 fulan-janeiru tinan 2025, hala’o sorumutu ho Prezidente Komisaun Funsaun Públika (CFP, sigla iha lian portugés), Agostinho Letêncio de Deus, no Komisáriu sira seluk, hodi analiza progresu ne’ebé alkansa ona iha tinan 2024 no avalia prioridades ba tinan 2025. Komisaun Funsaun Públika, ne’ebé tutela ba Ministru Prezidénsia Konsellu Ministrus, ho objetivu atu implementa medidas ne’ebé promove jestaun Administrasaun Públika ne’ebé efisiente no organizada liután. 

Iha tinan 2024, hala’o ona diagnóstiku ida kona-ba forsa traballu iha funsaun públika, no halo ona progresu kona-ba inisiativa sira ne’ebé prevee iha Planu Reforma Jestaun Rekursus Umanus Administrasaun Públika ba períodu tinan 2023-2028, ida mak aprovasaun Lei n. 7/ 2024 ne’ebé autoriza Governu hodi halo lejizlasaun kona-ba fiksasaun limite idade ba relasaun serbisu funsionáriu públiku no ajente administrativu sira nian, nune’e mós proposta ne’ebé iha ona preparasaun ba alterasaun Estatutu Funsaun Públika nian ho objetivu atu define limite ne’e. Kria mós grupu traballu ida ba implementasaun no operasionalizasaun Planu Reforma Jestaun Rekursus Umanus Administrasaun Públika nian, ne’ebé envolve reprezentante sira husi CFP no Ministériu Finansas. Asaun sira seluk inklui introdusaun ba rejime promosaun tuir antiguidade, revizaun ba Rejime Kargu Diresaun no Xefia no implementasaun teste promosaun setoriál ida ba karreira jerál, ne’ebé rezulta iha promosaun ba funsionáriu na’in-817, ne’ebé kobre kategoria profisionál oioin. 

Ba tinan 2025, aleinde finaliza atividade sira ne’ebé la’o hela iha prosesu reforma nian, prioridade sira inklui halo revizaun ba sistema karreira administrasaun públika nian, ho definisaun foun iha nivel formasaun no kapasitasaun, dezenvolvimentu karreira no rekrutamentu. Prevee mós iha tinan 2025 definisaun kona-ba medida forsa traballu Administrasaun Públika nian no reajustamentu salariál.