Iha loron 10 fulan-janeiru tinan 2025, Ministériu Agrikultura, Pekuária, Peska no Florestas lansa projetu konstrusaun ba sistema irrigasaun Maliana II, iha serimónia ida ne’ebé partisipa husi Primeiru-Ministru, Kay Rala Xanana Gusmão, iha área Mota Malibaka, Suku Tapo-Memo, Postu Administrativu Maliana, iha Munisípiu Bobonaru. 

Projetu ida-ne’e, finansia ho orsamentu besik dolar amerikanu millaun 9,8, sei fó benefísiu diretamente ba rai besik ektare 1.400, iha ne’ebé ektare 1.100 lokaliza iha Munisípiu Bobonaru no ektare 300 iha Munisípiu Belu, iha provínsia Nusa Tenggara Timur, Indonézia. Obra ne’e sei han tempu to’o fulan 30 hodi finaliza ninia ezekusaun. 

Durante ninia diskursu, Primeiru-Ministru destaka importánsia husi projetu ba dezenvolvimentu setór produtivu iha área rurál sira, hodi apela ba empreza ne’ebé responsavel ba konstrusaun hodi asegura kualidade obra no husu ba autoridade kompetente sira atu hametin mekanizmu kontrolu nian. Nia mós hato’o esperansa katak, ho sistema irrigasaun ida-ne’e, joven barak liután bele serbisu iha agrikultura, hodi ajuda hamenus dependénsia ba importasaun ai-han. 

Prezidente Autoridade Munisípiu Bobonaru, Alexandre Pires, hato’o agradesimentu ba Governu ba inisiativa ne’e, no subliña katak sistema irrigasaun Maliana II sei transforma rai ne’ebé antes ne’e abandonadu iha área produtiva sira, ho poténsia atu hasa’e maka’as produsaun agríkola lokál.

Tuir dadus ne’ebé iha, agrikultór Bobonaru sira antes ne’e prodús ona produtu agríkola besik tonelada 20 kada tinan, kuantidade ne’ebé hein katak sei aumenta maka’as ho entrada iha operasaun sistema irrigasaun foun. 

Primeiru-Ministru mós dezafia juventude Bobonaru atu diversifika sira-nia abilidade, hodi subliña importánsia atu aproveita oportunidade sira iha setór agríkola hodi hamosu valór ekonómiku, hamenus importasaun no bele halo esportasaun. 

Serimónia ne’e hetan partisipasaun husi membru Governu balun, inklui Vise-Primeiru-Ministru, Ministru Agrikultura, Pekuária, Peska no Florestas, Marcos da Cruz, Ministru Defeza, Donaciano do Rosário Gomes, Ministru Planeamentu no Investimentu Estratéjiku, Gastão Francisco de Sousa, no Sekretáriu Estadu Peskas, Pekuária no Florestas. Marka prezensa mós Embaixadór Indonézia nian iha Timor-Leste, Okto Dorinus Manik, Membrus Parlamentu Nasionál no reprezentante entidade oin-oin, aleinde agrikultór lokál no bainaka sira seluk.