Governu Timor-Leste

Prezidénsia Konsellu Ministrus

  Portavós Governu Timor-Leste

IX Governu Konstitusionál

...........................................................................................................................

Komunikadu Imprensa

Sorumutu Konsellu Ministrus nian iha loron 8 fulan-janeiru tinan 2025

Konsellu Ministrus hala’o sorumutu iha Palásiu Governu, Dili, no aprova projetu Rezolusaun Governu ne’ebé aprezenta hosi Primeiru-Ministru, Kay Rala Xanana Gusmão, kona-ba fó doasaun ho valór dolar millaun rua ba Repúblika Vanuatu.

Rai-nakdoko ho magnitude 7,3 akontese iha Port Vila iha loron 17 fulan-dezembru tinan 2024, hodi rezulta ema na'in-23 mate, na'in-200 liu hetan kanek no estraga maka'as infraestrutura esensiál sira, inklui Ospitál Sentrál no rezervatóriu bee nian rua. Hodi rekoñese urjénsia ba apoia populasaun sira ne’ebé afetadu no harii hikas área sira ne’ebé naksobu, desizaun ida-ne’e hatudu kompromisu Konstitusionál Repúblika Demokrátika Timor-Leste nian ba solidariedade no kooperasaun entre povu sira.

*****

Konsellu Ministrus aprova mós projetu Proposta Rezolusaun tolu ne’ebé sei submete ba Parlamentu Nasionál, ne’ebé aprezenta husi Vise-Ministra ba Asuntus ASEAN, , Milena Maria da Costa Rangel, kona-ba ratifikasaun akordu sira tuir mai ne’e:

1 - Akordu Servisu Aéreu ho Repúblika Populár Xina no Reinu Kamboja. Akordu sira-ne’e ho objetivu atu hametin relasaun amizade no kooperativa ho nasaun rua ne’e, nune’emós kontribui ba dezenvolvimentu setór transporte aéreu nian. Ho promosaun interkámbiu komersiál no aumenta ligasaun aérea regulár sira, akordu sira ne’e ho intensaun atu haburas kreximentu ekonómiku no promove turizmu. Akordu sira ne’e mós aliña ho Timor-Leste nia prosesu adezaun nu’udar membru plenu ba ASEAN no ho polítika “Céu Aberto” organizasaun nian.

2 - Akordu Izensaun Vistu ho Repúblika Demokrátika Populár Laos. Akordu ida-ne'e estabelese izensaun vistu ba objetivu turístiku ba titulár sira pasaporte komún nian, hodi permite entrada no estadia to'o loron 30. Medida ne’e ho objetivu atu hametin relasaun di’ak amizade no kooperasaun entre nasaun rua ne’e, aleinde fasilita interkámbiu turístiku no kumpre instrumentu sira ASEAN nian kona-ba rekoñesimentu resíproku ba pasaporte.

*****

Konsellu Ministrus mós aprova projetu sira tuirmai ne’ebé aprezenta husi Ministru Administrasaun Estatál, Tomás do Rosário Cabral:

1 - Dekretu-Lei ne’ebé regula funsionamentu Balkaun Úniku no Portál Munisipál, hodi reforsa desentralizasaun administrativa no modernizasaun servisu públiku sira iha Timor-Leste. Balkaun Úniku sei implementa iha munisípiu hotu-hotu no iha illa Ataúru, ho atendimentu prezensiál, móvel no telefóniku, nune’e bele simplifika prosedimentu administrativu, hadi’a efisiénsia no promove prosimidade entre Administrasaun Públika no sidadaun sira. Servisu móvel sei disponibiliza iha área remota sira liuhosi estrutura itinerante/movel sira ne'ebé adapta ona.

Diploma ne’e mós konsolida no habelar funsionalidade Portál Munisipál hanesan plataforma sentrál ba asesu informasaun no atendimentu públiku eletróniku sira, promove transparénsia no partisipasaun sívika. Entre inovasaun sira ne’e, iha obrigasaun hodi publika informasaun kona-ba jestaun munisipál, disponibilizasaun servisu administrativu online no reforsu ferramenta kontrolu sosiál nian.

Medida sira-ne’e ho objetivu atu hasa’e kualidade servisu públiku, hamenus kustu operasionál no promove governasaun lokál ne’ebé efisiente no partisipativu liu, tuir prinsípiu konstitusionál no estratéjia desentralizasaun Governu nian.

*

2 - Dekretu-Lei ne’ebé halo alterasaun daneen ba Dekretu-Lei n. 8/2013, loron 26 fulan-juñu, kona-ba Rejime Jurídiku Programa Nasionál Dezenvolvimentu Suku (PNDS).

 Iha kontestu intensifikasaun ba prosesu desentralizasaun administrativa, presiza ajusta enkuadramentu legál PNDS nian, liuliu kona-ba fonte finansiamentu ba despeza sira ne’ebé asosiadu ho nia ezekusaun. Revizaun ida-ne’e ho objetivu atu asegura klareza no adaptasaun ne’ebé boot-liu ba ezijénsia administrativa no finanseira foun ne’ebé impoin hosi desentralizasaun. Iha tempu hanesan, ho alterasaun ida-ne’e, halo klarifikasaun ba dispozisaun hosi diploma orijinál ne’ebé, durante faze implementasaun nian hamosu dúvida ka interpretasaun oioin, nune’e garante aplikasaun ida ne’ebé efikás liu no hodi aliña ho objetivu sira programa nian.

*

3 - Dekretu Governu kona-ba Orgánika Sekretariadu Tékniku Programa Nasionál Dezenvolvimentu Suku.

Tuir dispostu iha Dekretu-Lei n. 49/2023, loron 18 fulan-agostu, ne'ebé aprova orgánika Ministériu Administrasaun Estatál, diploma ida-ne'e adapta kuadru responsabilidade Sekretariadu Tékniku PNDS nian ba kuadru legál foun hosi Autoridade Munisipál sira, ne’ebé rekomenda hodi fó apoiu ba implementasaun PNDS iha lokál. Husi pontudevista orgániku, númeru servisu ne’ebé prevee iha diploma ida-ne’e mantein sira ne’ebé eziste ona, nune’e sei laiha aumentu iha despeza hanesan  rezultadu hosi hasa’e númeru servisu Sekretariadu Tékniku Programa Nasionál Dezenvolvimentu Suku nian.

*****

Aprova mós projetu Rezolusaun Governu nian ida ne’ebé aprezenta hosi Ministru Defeza, Donaciano do Rosário Gomes, kona-ba Referensiál Polítika Kooperasaun Internasionál. Referensiál ida-ne’e hanesan dokumentu estruturante no orientadór ida hodi estabelese parseria estratéjika sira kona-ba kooperasaun militár internasionál, liuhusi referensiál ne’e promove matadalan no liña asaun lubun ida ho objetivu atu define forma no regra sira kooperasaun nian nune’e bele otimiza kapasidades ne’ebé F-FDTL iha. Iha ámbitu Kooperasaun Internasionál iha Área Defeza, promove mós kriasaun Gabinete Koordenasaun Polítika Internasionál Kooperasaun, ne’ebé depende direta ba membru Governu ne’ebé responsavel ba área Defeza, ho misaun atu jere no koordena dossier kooperasaun hotu-hotu ho nasaun belun sira.

*****

Primeiru-Ministru, Kay Rala Xanana Gusmão, halo aprezentasaun ida kona-ba Programa Lejizlativu Governu IX nian. Programa ida ne’e sei elabora tuir proposta sira ne’ebé membrus Konsellu Ministru aprezenta no hanesan previzaun ida kona-ba intervensoins lejizlativas Governu nian, ne’ebé organiza tuir setores no prioridades, ba períodu tinan 2025.

*****

Ikusliu, Ministra Finansas, Santina José Rodrigues F. Viegas Cardoso, halo aprezentasaun ida ba Konsellu Ministrus kona-ba regras ezekusaun Orsamentu Jerál Estadu ba tinan 2025, ne’ebé estabelese tuir Dekretu-Lei N. 43/2024 loron 20 fulan-dezembru. REMATA