Ministru Prezidénsia Konsellu Ministrus, Agio Pereira, iha loron 20 fulan-dezembru tinan 2024, iha Palásiu Governu, Dili, fó pose ba Anita Tavares Ribeiro de Jesus nu’udar Komisária Komisaun Funsaun Públika (KFP), hodi ezerse, ho rejime dedikasaun eskluziva, to’o loron 22 fulan-novembru tinan 2028, iha ne’ebé nia hetan nomeasaun tuir Rezolusaun Governu n. 61/2024, loron 21 fulan-novembru.

Anita Tavares, ezerse ona “kargu Diretora Rekursus Umanus iha Ministériu Edukasaun” no mós kargu “Diretora iha Sekretariadu Komisaun Funsaun Públika, “nia hatene didi’ak kona-ba difikuldade, dezafiu sira no kompleksidade misaun nian ne’ebé ohin nia simu”, destaka Ministru Agio iha nia diskursu.

Ministru Prezidénsia Konsellu Ministrus defende katak “hafoin tinan 15 husi ninia kriasaun, Komisaun Funsaun Públika, agora iha mandatu dahaat, hasoru dezafiu sira ne’ebé lansa hosi Programa Governu Konstitusionál IX”, “ne’ebé inklui hadi’a efikásia , efisiénsia no profisionalizmu Administrasaun Públika nian, ba prestasaun servisu públiku ne’ebé di’ak-liu, hanesan fatór krusiál ba implementasaun polítika no programa dezenvolvimentu ne’ebé atu hamenus moris-ki’ak, promove progresu no moris-di’ak populasaun nian”.

Atu atinje objetivu ida ne’e, “Governu planeia ona atu reforma jestaun rekursus umanus iha Administrasaun Públika, liuhusi Komisaun Funsaun Públika no Ministériu Finansas nu’udar impulsionadór”.  “Entre objetivu sira hosi planu reforma nian”, Agio Pereira destaka “estabelesimentu estrutura ba funsaun públika no aumenta investimentu iha dezenvolvimentu kapitál umanu, hodi bele atrai no mantein joven sira-nia talentu ba servisu públiku”.

Ministru Prezidénsia Konsellu Ministrus defende mós katak “paradigma tuan funsionáriu públiku nu’udar ema ne’ebé restritu atu kumpre norma, prosedimentu no oráriu ne’ebé presiza troka ho vizaun moderna, ne’ebé foka ba rezultadu, inovasaun no impaktu reál ba sosiedade”. “Mentalidade funsionáriu públiku ohin-loron nian presiza marka ho valór sira hanesan proatividade, empatia no kompromisu ba exelénsia”, nia hatutan.

Anita Tavares Ribeiro de Jesus espresa ninia kompromisu atu hala’o ninia knaar “ho izensaun, dedikasaun no responsabilidade ne’ebé másimu nomos sempre tau iha konsiderasaun loloos interese Estadu nian, Programa Governu no valór sira funsaun públika nian” no kompromete atu “serbisu hodi defende bein públiku no serbí komunidade no povu, ho izensaun, onestidade, profisionalizmu no loloos, no salvaguarda interese di’ak liu nasaun nian”.

Serimónia simu pose ne’e partisipa husi  Sekretária Estadu Igualdade, Elvina de Sousa Carvalho, Sekretáriu Estadu Komunikasaun Sosiál, Expedito Dias Ximenes, Prezidente KFP, Agostinho Letêncio de Deus, Komisárius KFP, Fausto Freitas da Silva, José Telo Soares Cristovão no Agapito da Conceição, Komisáriu Komisaun Anti-Korrupsaun (KAK) nian, Rui Pereira, Inspetór Jerál Estadu, Francisco de Carvalho, Provedór Direitus Umanus no Justisa, Virgílio Guterres, Xefe Gabinete Ministru Prezidénsia Konsellu Ministrus, Vitor Maia, Diretór-Jerál Administrasaun Prezidénsia Konsellu Ministrus, Pedro Feno, Diretóra-Jerál Administrasaun no Finansas, Cecilia Assis, Sebastião Pereira husi Ministériu Administrasaun Estatal, Amu Pároku Balide nian, Angelo Trindade no representante sira-seluk KFP nian.