Governu Timor-Leste

Prezidénsia Konsellu Ministrus

  Portavós Governu Timor-Leste

IX Governu Konstitusionál

...........................................................................................................................

Komunikadu Imprensa

Sorumutu Estraordináriu Konsellu Ministrus nian iha loron 16 fulan-dezembru tinan 2024

Konsellu Ministrus hala’o sorumutu iha Palásiu Governu, Dili, no aprova proposta inisiál sira Timor-Leste nian, ne’ebé aprezenta hosi Vise-Ministra ba Asuntus ASEAN, Milena Maria da Costa Rangel, kona-ba adezaun ba Akordu-Kuadru ASEAN kona-ba Servisus (AFAS, ASEAN Framework Agreement on Services), Akordu kona-ba Komérsiu Servisus ASEAN (ATISA, ASEAN Trade in Services Agreement) no Akordu Komérsiu Bens ASEAN (ATIGA, ASEAN Trade in Goods Agreement), iha ámbitu prosesu negosiasaun adezaun Timor-Leste nian ba ASEAN.

Modalidade sira ne’ebé propoin ona trasa prinsípiu orientadór ba negosiasaun sira, hodi konsidera kontestu Timor-Leste nian. Entre objetivu sira maka kumprimentu progresivu hosi kompromisu sira hodi liberaliza bens no servisus, tuir padraun ASEAN nian, maibé ho fleksibilidade ne'ebé adekuadu, hodi bele garante katak obrigasaun sira ne'ebé asume proporsionál ho nivel atuál dezenvolvimentu Timor-Leste nian no ninia kapasidade institusionál sira. Enkuadramentu ida-ne’e ho objetivu atu garante ekilíbriu entre integrasaun rejionál no salvaguarda interese estratéjiku no ekonómiku nasionál sira, hodi promove kreximentu sustentável no kompetitividade iha setór produtivu no servisus país nian.

*****

Konsellu Ministrus aprova projetu Dekretu-Lei ba Alterasaun Dahuluk husi Dekretu-Lei n. 1/2015, loron 14 fulan-janeiru, kona-ba Fundu Espesiál ba Dezenvolvimentu. Diploma ne’e aprezenta hosi Primeiru-Ministru, Kay Rala Xanana Gusmão, Prezidente Autoridade Rejiaun Administrativa Espesiál Oekusi Ambenu (RAEOA), Rogério Tiago de Fátima Lobato, no Koordenadór Komisaun Ezekutiva ba estabelesimentu Zona Dezenvolvimentu Ekonómika Espesiál iha Oekusi Ambenu (ZEEDOA), João Mendes Gonçalves.

Objetivu hosi diploma ida-ne’e mak atu adapta Fundu Espesiál Dezenvolvimentu RAEOA nian tuir dispozisaun foun Lei n. 18/2023, iha loron 30 fulan-novembru, ne’ebé halakon Zona Espesiál Ekonomia Sosiál Merkadu Oekusi Ambenu no Ataúru no prevee kriasaun Zona Ekonómika Espesiál foun ida. Define filafali atribuisaun no objetivu sira Fundu nian, ne’ebé tutela mós hosi Primeiru-Ministru.

Diploma ne’e prevee implementasaun rejime tranzitória ida ba Fundu Espesiál Dezenvolvimentu nian, hodi fornese ba nia instrumentu jestaun no kapasidade operasionál ne’ebé permite hahú projetus prioritáriu ba dezenvolvimentu, prepara estrutura jestaun ida ne’ebé efisiente no finansia projetu estratéjiku tinan-barak ho karákter sosiál no ekonómiku. Medida sira-ne’e ho objetivu atu garante resposta ba estratéjia dezenvolvimentu ba Oekusi Ambenu hotu iha tempu médiu no tempu naruk, ho benefísiu reál liuliu ba populasaun Oekusi no Timor-Leste ein jerál.

*****

Tuir projetu ne’ebé aprezenta hosi Ministru Prezidénsia Konsellu Ministrus, Agio Pereira no Sekretáriu Estadu Komunikasaun Sosiál, Expedito Dias Ximenes, Konsellu Ministrus delibera hodi fó-naran Francisco Borja da Costa ba Edifísiu Sentrál foun Rádiu no Televizaun Timor-Leste (RTTL, EP), Empreza Públika, naran Nino Konis Santana ba Auditóriu RTTL, EP no naran David Alex ‘Daitula’ ba Estúdiu Multifunsoins RTTL, EP nian.

Edifísiu atuál Rádiu no Televizaun Timor-Leste nian, iha tinan sira ikus ne’e hetan estragus oin-oin, liuliu kauza husi inundasaun. Tanba ne’e, presiza konstrusaun ba edifísiu foun ida ne’ebé bele hadi’a kualidade servisu ne’ebé presta husi empreza públika ida-ne’e ho signifikativu.

Serimónia lansamentu fatuk dahuluk ba edifísiu foun ne’e marka ba loron 19 fulan-dezembru tinan 2024.

*****

Konsellu Ministrus aprova projetu Dekretu-Lei ida, ne’ebé aprezenta husi Ministra Saúde, Elia A. A. dos Reis Amaral, kona-ba Rejime importasaun, armazenamentu, distribuisaun, fa’an no esportasaun produtus farmaséutikus no ekipamentus médikus.

Diploma ida-ne’e ho objetivu atu substitui Dekretu-Lei n. 12/2004, loron 26 fulan-maiu, hodi adapta enkuadramentu legál ba mudansas sosiais, ekonómikas no regulatórias, tantu iha nivel internu no mós internasionál. Regulamentasaun foun ne’e promove separasaun husi atividade importasaun, armazenamentu no distribuisaun, fa’an rahun iha farmásia sira, hodi garante espesializasaun ne’ebé boot-liu no reforsu ba protesaun saúde públika. Atividade fa'an produtu farmaséutiku no ekipamentu médiku sira mós haketak hosi atividade prestasaun kuidadu saúde médiku, enfermajen, diagnóstiku ka terapéutiku iha farmásia sira, ida ikus ne'e bandu iha farmásia sira. Halo mós proibisaun ba propriedade liu husi farmásia ida iha kada munisípiu no konsertasaun folin, hodi prevene situasoins oligopóliu no monopóliu ne’ebé bele prejudika asesu populasaun nian ba produtus farmaséutikus.

Entre inovasaun prinsipál sira, mak ezijénsia kondisoins espesífikas ba armazenamentu no fa’an produtus farmaséutikus, hanesan kontrolu rigorozu ba temperatura, mahon-been no naroman. Diploma ne'e mós prevee ezisténsia hosi espasu sira ne'ebé diferente, tantu iha atividade sira armazenamentu nian ka iha fa’an rahun sira, hodi rai no konserva narkótiku no substánsia psikotrópika sira, ka atu hasai hosi merkadu produtus farmaséutiku ne'ebé haruka, bainhira liu ona prazu, falsifikadu, adulteradu no aat ona.

Diploma ne’e estabelese mós ezisténsia obrigatoriedade husi diretór tékniku, farmaséutiku ida ne’ebé permanente no eskluzivu, nomos aprezentasaun relatóriu fulan-fulan ba Ministériu Saúde, ne’ebé tenke inklui atividade importasaun, armazenamentu no fa’an nian.

Rejime foun ne’e introdús medidas reforsadas kona-ba fiskalizasaun no penalizasoins, ho objetivu atu asegura kualidade no seguransa ba produtus farmaséutikus ne’ebé disponivel iha merkadu. Prevee mós períodu tranzisaun durante loron 180, hodi permite katak entidades ne’ebé daudaun hala’o hela sira-nia atividade atu adapta ho regras foun. Diploma ne’e tama iha vigór iha loron tuirmai hafoin publikasaun, hodi revoga Dekretu-Lei n. 12/2004, loron 26 fulan-maiu.

*****

Konsellu Ministrus aprova projetu Dekretu-Lei, ne’ebé aprezenta hosi Ministru Transportes no Komunikasoins, Miguel Marques Gonçalves Manetelu, ba estabelesimentu taxa administrativa ne’ebé tenke selu ba aktus no servisus relasiona ho kontrolu ba limite pezu hosi veíkulu transporte merkadoria nian.

Diploma ne'e regula aktu no servisu administrativu sira ne'ebé relasiona ho kontrolu ba pezu hosi veíkulu sira transporte merkadoria nian ne'ebé sujeita ba pagamentu taxa nian sira, hodi define ninia valór sira atu nune'e bele kumpre Rejime Pezu Autorizadu ba Veíkulu sira Transporte Merkadoria nian. Valór Taxa ba pezu baibain varia tuir númeru roda iha veíkulu: Dolar amerikanu 30 ba veíkulu ho roda 4, Dolar amerikanu 35 ba veíkulu ho roda 6, dolar amerikanu 40 ba veíkulu ho roda 8 no dolar amerikanu 45 ba veíkulu ho roda 10 ka liu. Verifikasaun ba ninia todan, ne’ebé hala’o hafoin hasai todan ne’ebé liu, iha kustu fiksu ho dolar amerikanu 5 kada kilograma ne’ebé liu.

Diploma ne'e mós estabelese limite másimu pezu ne’ebé hetan autorizasaun ba kategoria veíkulu ida-idak: 5.000 kg ba veíkulu ho eixu 2 no roda 4, 8.500 kg ba veíkulu ho eixu 2 no roda 6, 15.500 kg ba veíkulu ho eixu 3 no roda 6, no 18.000 kg ba veíkulu ho eixu 3 no roda 10. Veíkulu sira ne’ebé servisu ba Estadu, forsa defeza no seguransa, misaun diplomátika no entidade públika sira seluk hetan izensaun hosi regulamentu ida-ne’e. Sei bandu sirkulasaun veíkulu sira nian to'o regulariza taxa pendente sira no pezu boot liu, ho sansaun sira ne'ebé prevee iha lejizlasaun ne'ebé bele aplika bainhira laiha kumprimentu.

Dekretu-Lei ida-ne’e ho objetivu atu kontribui ba prezervasaun infraestrutura estrada no ponte, hadi’a seguransa iha tráfiku automovel no garante kumprimentu ba padraun legál husi operadór transportes merkadoria nian.

*****

Ikusliu, Konsellu Ministrus aprova projetu Dekretu-Lei ida kona-ba regulamentasaun direitu hodi halo check-up saúde ne’ebé prevee ona iha Estatutu Titulár Órgaun Soberanu sira nian. REMATA