GOVERNU KONSTITUSIONÁL BA DA-IV
SEKRETARIA ESTADU KONSELLU MINISTRU
……………………………………………………………………………………………………………………………
KOMUNIKADU IMPRENSA
Sorumutu Konsellu Ministrus 20 Outubru 2010
Sorumutu Konsellu Ministrus iha Quarta-feira, 20 Outubru 2010, iha ninia Sala Sorumutu, Palásiu Governu, Díli, no analiza tiha :
1. Aprezentasaun Estratéjia Nasionál kona-ba Empregu
Atu kombate moris kiak liu hosi harii servisu no hamosu rendimentu iha setór ekonomia hirak konsidera determinante, mak IV Governu Konstitusionál konsidera hanesan presiza hola asaun ida organizada, ne’ebé bele involve Ministériu no Sekretaria Estadu relevante sira hotu. Ba ida-ne’e, mak iha tinan 2007, hahú tiha ona ho prosesu ida-ne’ebé Sekretaria Estadu Formasauan Profisionál no Empregu mak lidera. Sira fó sai tiha dokumentu baze ida hamutuk ho análize kona-ba variante hirak relasiona ho empregu no dezempregu no asuntu hirak seluk ne’ebé mak iha relasaun ho ida -ne’e, iha Timor-Leste, ne’ebé mak ninia objetivu atu hametin tan formula kona-ba estratéjia hirak adekuadu. Hala’o mós konsulta ho parte hirak interesadu la’os de’it iha nasionál, maibé mós internasionál, hodi ba dala ikus-liu hala’o sorumutu no kolókiu barak-barak iha fulan Maiu no Juñu, tinan ida-ne’e nian.
Anteprojetu ne’ebé aprezenta ba iha Konsellu Ministrus hetan ninia dezeñu atu bele responde ba difikuldade hirak bele impede netik atu empregu bele sai barak. Pilár fundamentál tolu mak hetan atensaun kona-ba opsaun polítika no estratéjika sira, mak hanesan: harii kondisaun hirak adekuadu atu bele hakbit kresimentu no loke fila fali prokura ba maun-de-obra nian; Atu prevee no satisfás prokura no kualifikasaun profisionál paíz ida nian ne’ebé mak dezenvolvimentu ne’e maka’as; no, atu halo sai di’ak liu tan funsaun hosi mediasaun nian iha merkadu servisu nian.
Presiza mós atu dehan sai katak Estratéjia Nasionál ba Empregu ne’e elabora hodi haree mós ba iha objetivu hirak hosi Planu Estratéjiku Dezenvolvimentu Nasionál nian ba tinan 2011-2030.
2. Aprezentasaun kona-ba Merkadu sira no Retornu Investimentu nian
Aprezentasaun ida-ne’e hanesan ninia objetivu mak atu hadi’a tan ema nia komprensaun kona-ba opsaun hirak ne’ebé iha ba Governu no Estadu, buat hirak ne’e hotu, bainhira koalia kona-ba maksimizasaun lukru investimentu nian, hodi fó marjen ida luan liu ba kálkulu Rendimentu Sustentável nian.