Vise-Primeiru-Ministru, Ministru Koordenadór Asuntus Sosiais no Ministru Dezenvolvimentu Rurál no Abitasaun Komunitária, Mariano Assanami Sabino, reprezenta Xefe Governu, Kay Rala Xanana Gusmão, lidera iha loron 6 fulan-dezembru tinan 2024, serimónia lansamentu fatuk dahuluk ba konstrusaun infraestruturas estratéjikas iha setór peskas nian iha Laleia, munisípiu Manatutu. 

Serimónia ne’e hahú ho asina kontratu arrendamentu, ne’ebé asina entre Governu, ne’ebé reprezenta hosi Ministru Justisa, Sérgio Hornay, no empreza sira ne’ebé envolve. Tuirmai halo lansamentu fatuk dahuluk ba infraestruturas ne’ebé sei dezenvolve husi empreza nasionál Timor South Sea Fishery Development Lda. iha parseria ho empreza xineza Guanxi Yixin Fishery Development Co. Ltd. 

Durante ninia diskursu, Vise-Primeiru-Ministru agradese ba empreza sira ne’ebé envolve ba sira-nia kompromisu hodi kolabora no investe iha setór peska nian. Nia subliña mós importánsia hosi esforsu hamutuk ne’e hodi hametin ekonomia nasionál no kria oportunidade empregu foun ba sidadaun timoroan sira. 

Mariano Assanami Sabino esplika mós katak, projetu ida-ne’e diskute ba dahuluk iha tinan 2013, durante enkontru ida entre Primeiru-Ministru, Xanana Gusmão, ho Prezidente Xina. Hahú husi ne’ebá, parte rua ne’e halo kompromisu maka’as ida, ne’ebé oras ne’e konkretiza iha lideransa Governu IX nia okos, hodi transforma vizaun estratéjika ida-ne’e sai realidade. 

Projetu ne’e konsideradu ho karater estratéjiku, hodi prevee kriasaun númeru boot ba kampu traballu ba joven timoroan sira, no mós promove dezenvolvimentu sustentável iha rejiaun ne’e. Vise-Primeiru-Ministru destaka importánsia hosi kolaborasaun ativa entre komunidade lokál no empreza sira, hodi reforsa nesesidade seguransa no estabilidade iha dezenvolvimentu atividade sira ne’e.

Lori Xefe Governu nia naran, Vise-Primeiru-Ministru husu ba empreza sira atu hatudu seriedade iha ezekusaun projetu ne’e, hodi garante rezultadus konkretus ne’ebé tuir espetativa ne’ebé hamosu.

Aleinde Vise-Primeiru-Ministru no Ministru Justisa, serimónia ne’e hetan partisipasaun husi Vise-Ministru Administrasaun Estatál, Jacinto Rigoberto G. de Deus, Sekretáriu Estadu Terras no Propriedades, Jaime Xavier, Sekretáriu Estadu Peskas, Domingos da Conceição dos Santos, Sekretáriu Estadu Asuntus Toponímia no Organizasaun Urbana, Germano Santa Brites Dias, Prezidente Autoridade Munisípiu Manatutu nian, líderes komunitárius, reprezentantes relijiozus, membrus hosi Polísia Nasionál Timor-Leste (PNTL), Forsa Defeza Timor-Leste (F-FDTL), no mós membru komunidade sira seluk.