Vise-Primeiru-Ministru no Ministru Dezenvolvimentu Rurál no Abitasaun Komunitária, Mariano Assanami Sabino, lansa ofisialmente, iha loron 8 fulan-dezembru tinan 2024, projetu ba implementasaun atividade integradu sira iha Aldeia Mota-Ikun, Suku Mota-Ulun (Kaitehu), iha Likisá. Ida-ne’e ho objetivu atu hametin dezenvolvimentu ekonómiku no sosiál komunidade lokál nian liuhosi inisiativa sira ne’ebé integradu no sustentável. 

Atividade sira ne’ebé implementa inklui hakiak ikan, kafetaria ida, kampu desportu, fatin rekreiu no inisiativa turizmu komunitáriu. Asaun hirak-ne’e aliña ho estratéjia Governu nian hodi haburas kreximentu ekonómiku iha nivel lokál no promove organizasaun komunitária. Iha mós planu atu harii alojamentu ne’ebé inspira husi uma tradisionál Suku ida-ne’e nian no sala multiuzu ida, ne’ebé uza ba eventu sira hanesan semináriu no selebrasaun komunitária sira.

 “Ho atividade sira-ne’e, aleinde hadi’a ekonomia aldeia nian, ami hakarak atu promove mudansa mentalidade iha sosiedade, enkoraja servisu hamutuk iha ámbitu demokrasia partisipativu no organizasaun komunitária ne’ebé forte liu”, destaka Vise-Primeiru-Ministru durante eventu ne’e. 

Atu konkretiza projetu ne’e, Governu, liuhosi Ministériu Dezenvolvimentu Rurál no Abitasaun Komunitária, aloka orsamentu hamutuk dolar amerikanu rihun 50. Projetu ne’e sei jere husi mahorik sira aldeia nian, hodi garante katak rendimentu ne’ebé hetan bele investe fali iha inisiativa lokál sira seluk.

Vise-Primeiru-Ministru ne’e apela ba komunidade atu kaer projetu ne’e ho responsabilidade, alerta katak, karik iha jestaun ne’ebé ladi’ak, aldeia ne’e bele la hetan benefísiu hosi projetu sira iha futuru.

Ministériu sei kontinua fó asisténsia, inklui formasaun ne’ebé ho objetivu atu kapasita komunidade hodi jere projetu ne’e ho dalan ne’ebé sustentável, nune’e garante dezenvolvimentu ekonómiku ne’ebé sólidu no efetivu liután ba aldeia ne’e. 

Marka prezensa iha serimónia ne’e Sekretáriu Estadu Pekuária, José Vieira de Araújo, Diretór-Jerál Dezenvolvimentu Rurál, Filipe Cardoso, Diretór Abitasaun Komunitária, Diretór-Jerál Asuntus Korporativus, reprezentantes hosi Sekretaria Estadu Kooperativas, Prezidente Autoridade Munisípiu Likisá nian, autoridade lokál, membru komunidade no konvidadu sira seluk.