Governu Timor-Leste

Prezidénsia Konsellu Ministrus

  Portavós Governu Timor-Leste

IX Governu Konstitusionál

...........................................................................................................................

Komunikadu Imprensa

Sorumutu Konsellu Ministrus nian iha loron 11 fulan-dezembru tinan 2024

Konsellu Ministrus hala’o sorumutu iha Palásiu Governu, Dili, no aprova projetu Rezolusaun Governu, ne’ebé aprezenta husi Sekretáriu Estadu Komunikasaun Sosiál, Expedito Dias Ximenes, ne’ebé tuir ninia pedidu, ezonera Prezidente atuál Konsellu Diretivu TATOLI - Ajénsia Notisioza Timor-Leste I.P., no nomeia Noémio Mateus Soares Falcão, hanesan Prezidente foun ba Konsellu Diretivu TATOLI - Ajénsia Notisioza Timor-Leste I.P., ba períodu tinan haat, hahú husi loron 1 fulan-janeiru tinan 2025.

****

Aprova mós Projetu Dekretu-Lei, ne’ebé aprezenta husi Ministra Finansas, Santina José Rodrigues F. Viegas Cardoso, hodi aprova pagamentu estraordináriu saláriu adisionál fulan ida nian ba Administrasaun Públika no pensaun adisionál ba eis titulár no eis - membru órgaun soberania sira.

Diploma ne’e prevee atribuisaun pagamentu estraordináriu ba funsionáriu, ajente no kontratadu sira Administrasaun Públika nian, ba titulares kargu públiku sira, ba membrus FALINTIL – Forsa Defeza Timor-Leste, Polísia Nasionál Timor-Leste no Sistema Nasionál Intelijénsia, no mós pensaun adisionál ba eis-titular no eis-membru órgaun soberania sira.

Pagamentu estraordináriu ida-ne'e, korresponde ba saláriu da-13, sei halo iha fulan-dezembru tinan 2024, ho valór montante hosi saláriu ka pensaun mensál benefisiáriu nian iha períodu ne'e, ho limite másimu ne'ebé ekivalente ba Prezidente Repúblika nia saláriu. Kontratadu estranjeiru sira esklui hosi pagamentu ida-ne'e. Finansiamentu ba medida ida-ne'e sei asegura hosi dotasaun orsamentál hosi entidade empregadór ida-idak nian no, karik nesesáriu, sei aumenta hosi Orsamentu Jerál Estadu ba tinan 2025 nian.

 ****

Koordenadór Komisaun  Ezekutiva ba estabelesimentu Zona Ekonómika Espesiál ba Dezenvolvimentu iha Oekusi Ambenu (ZEEDOA), João Mendes Gonçalves, aprezenta ba Konsellu Ministrus Relatóriu kona-ba situasaun dezenvolvimentu Rejiaun Administrativa Espesiál Oekusi Ambenu (RAEOA ). Dokumentu ne’e aprezenta rezultadus hosi estudu ida ne'ebé halo hosi Komisaun Ezekutiva, ne'ebé kobre la'ós de'it investimentu no rezultadus hosi Zona Espesiál Ekonomia Sosiál Merkadu Timor-Leste (ZEESMTL) nian, maibé mós dezenvolvimentu hosi setór sira seluk.

Dokumentu ida-ne’e hanesan instrumentu importante ida ba Komisaun Ezekutiva, hodi fasilita elaborasaun ba planu investimentu estratéjiku ida, ne’ebé inklui definisaun orsamentu ba zona ekonómika espesiál ba dezenvolvimentu iha Oekusi Ambenu, ne’ebé sei submete ba Konsellu Ministrus.

Relatóriu ne’e relevante mós ba Autoridade RAEOA atuál no parseiru dezenvolvimentu sira, tanba sai hanesan referénsia importante ida ba planeamentu no ezekusaun sira-nia atividades iha futuru.

 ****

Konsellu Ministrus aprova mós projetu Dekretu-Lei, ne’ebé aprezenta husi Ministra Finansas, Santina José Rodrigues F. Viegas Cardoso, kona-ba Ezekusaun Orsamentu Jerál Estadu ba tinan 2025.

Diploma ida-ne’e estabelese regras kona-ba ezekusaun Orsamentu Jerál Estadu ba tinan 2025, ne’ebé aprova husi Lei n. 8/2024, loron 26 fulan-novembru. Normas ne’ebé hatuur iha Dekretu-Lei ne’e bele aplika ba servisu no entidade hotu-hotu iha Subsetór Administrativa Sentrál, Subsetór Seguransa Sosiál no Subsetór Rejiaun Administrativa Espesiál Oekusi Ambenu nian.

****

Tuir projetu sira ne’ebé aprezenta husi Ministra Finansas, Konsellu Ministrus delibera hodi autoriza Kanselamentu ba Akordus Finansiamentu ho International Development Association hosi Grupu Banku Mundiál ne’ebé iha relasaun ho:

• Projetu “Timor-Leste Basic Education Strengthening and Transformation”, loron 29 fulan-dezembru tinan 2020, ho montante millaun 10,9 Direitos de Saque Especiais (SDR, sigla iha lian inglés), ekivalente ho dolar amerikanu millaun 14,4 (Empréstimu n. 6551-TP).
• Projetu “Timor-Leste Water Supply and Sanitation”, loron 29 fulan-dezembru tinan 2020, ho montante millaun 18,2 SDR, ekivalente ho dolar amerikanu millaun 24,1 (Empréstimu n. 6559-TP).

• Projetu “Dili Water Supply”, loron 27 fulan-jullu tinan 2022, ho montante millaun 87,6 SDR (ekivalente ho dolar amerikanu millaun 116 (Empréstimu n. 7100-TP).

Hafoin halo análize kle’an ida ba projetu sira ne’ebé finansia husi empréstimus, konklui katak projetu balu seidauk hahú ka iha taxa ezekusaun ne’ebé ki’ik tebes, Governu deside atu kansela ka reformula projetus balun, no esplora fontes finansiamentu sira seluk ba projetu sira seluk, nune’e Akordus Finansiamentu ne’ebé asina ona la presiza tan.

****

Konsellu Ministrus aprova projetu Dekretu Governu nian, ne’ebé aprezenta husi Ministru Administrasaun Estatál, Tomás do Rosário Cabral, ne’ebé fiksa data sira realizasaun Asembleias Aldeia no Konsellus Suku, iha ámbitu prosedimentus eleisaun lideres komunitárius nian.

Diploma ida-ne’e kumpre saida maka temi iha artigu 92.º husi Lei n. 9/2016, loron 8 fulan-jullu, hahú prosesu eleisaun ba lider komunitária sira iha Suku Ueru Mata (Laga, Baukau), Builai (Baukau, Baukau), Kaibada Makasa'e (Baukau, Baukau), Assui-Lau (Letefoho, Ermera), KoliateLewen (Hatolia A, Ermera), Poetete Vila (Ermera, Ermera), PoeteteLodudu (Ermera, Ermera), Macadique de Cima (Uato -Lari, Vikeke) no Macadique de Baixo (Uato-Lari, Vikeke). Liuhusi Dekretu Governu ida-ne’e aprova mós kalendáriu eleisaun ba Xefe Suku Baduro (Lautein, Lautein), Laku-Mesak (Laklo, Manatutu), Iliheu (Manatutu Vila, Manatutu) no Poetete (Ermera, Ermera) .

Konsellu Suku sira hala’o sorumutu iha loron 10 fulan-janeiru tinan 2025, hodi hili membru sira ba meza eleitorál no simu kandidatura ba Xefe Suku.

Asembleia Aldeia sira sei hala’o iha loron 25 fulan-janeiru 2025, hodi hili membru meza eleitorál, aprezenta no vota kandidatura sira ba Delegadu Konsellu Suku, Xefe Aldeia no Xefe Suku sira, aleinde hala’o kontajen no verifikasaun inisiál ba rezultadu sira, no mós análize ba rekursus ne'ebé iha relasaun ho desizaun eleisaun nian.

Karik laiha kandidatu Xefe Suku ne’ebé maka hetan votu válidu liu metade ne’ebé fó-sai, Asembleia Aldeia sira sei hasoru malu, hodi hala’o votasaun daruak iha loron 10 fulan-fevereiru tinan 2025.

Konsellu Suku sira sei hasoru malu iha loron 26 fulan-janeiru 2025 hodi akompaña apuramentu finál ba rezultadu eleisaun Xefe Suku sira, deside kona-ba rekursus ruma no fó-sai rezultadu finál. Karik akontese votasaun daruak, sei hala'o reuniaun foun iha loron 11 fulan-fevereiru tinan 2025 ba objetivus ne’ebé hanesan kona-ba volta daruak nian.

Konsellu Suku sira sei hasoru malu iha loron 5 fulan-fevereiru 2025 atu hili Lian-na'in no Reprezentante Juventude sira ba Konsellu Suku. Bainhira akontese votasaun daruak ba Xefe Suku sira, eleisaun ba figura sira-ne'e sei hala'o iha loron 21 fulan-fevereiru tinan 2025.

****

Konsellu Ministrus delibera hodi autoriza Ministra Finansas no Ministru Obras Públikas hodi halo negosiasaun filafali ho Banku Aziátiku Desenvolvimentu (ADB) ba ámbitu empréstimu hodi finansia konstrusaun sistema abastesimentu bee-moos no saneamentu iha Lospalos, ho kustu ne’ebé prevee dolar amerikanu millaun 22,48, no Same, ho kustu ne’ebé prevee dolar amerikanu millaun 20,59.

****

Konsellu Ministrus analiza aprezentasaun ida kona-ba “Projetu jestaun rezíduus sólidus iha Dili”.

Durante aprezentasaun, halo enkuadramentu ida kona-ba projetu nia situasaun no analiza kontratu oioin ne'ebé relasiona ho nia implementasaun. Membrus Konsellu Ministrus mós diskute kona-ba solusaun legál sira ne’ebé posivel hodi ultrapasa limitasaun sira ne’ebé hasoru iha ezekusaun kontratu sira ba projetu ida-ne’e.

****

Konsellu Ministrus aprova projetu Rezolusaun Governu nian, ne’ebé aprezenta hosi Ministru Negósius Estranjeirus no Kooperasaun, Bendito dos Santos Freitas, ne’ebé formaliza Programa Estratéjiku ba Kooperasaun Timor-Leste – Portugál ba períodu 2024-2028, ne’ebé asina iha Lizboa iha loron 14 fulan-outubru tinan 2024.

Programa ne’e ho objetivu atu hametin parseria entre nasaun rua ne’e, bazeia ba sira-nia afinidade istórika, kulturál no linguístika, no aliña ho kompromisu globál sira, hanesan Ajenda Nasoins Unidas 2030, Estratéjia Kooperasaun Portugeza 2030, Planu Estratéjiku Dezenvolvimentu 2011 -2030 no planu estratéjiku nasionál no sektorál sira seluk ho objetivu atu kontribui ba dezenvolvimentu sustentável Timor-Leste nian.

****

Konsellu Ministrus aprova mós projetu Rezolusaun Governu nian rua, ne’ebé aprezenta mós hosi Ministru Negósius Estranjeirus no Kooperasaun, relasiona ho aprovasaun Akordu Kooperasaun entre Repúblika Demokrátika Timor-Leste no Repúblika Portugál iha Área Infraestruturas no Protokolu Kooperasaun entre Ministériu Turizmu no Ambiente Repúblika Demokrátika Timor-Leste no Ministériu Ekonomia Repúblika Portugeza ba Dezenvolvimentu no Implementasaun Programa REVIVE. Dokumentu rua ne'e asina iha Lizboa, iha loron 14 fulan-outubru tinan 2024.

Akordu Kooperasaun iha área Infraestruturas sei permite Timor-Leste hetan benefísiu hosi parserias ho instituisaun públika portugés sira, ne’ebé kontribui ba implementasaun no dezenvolvimentu infraestrutura esensiál sira ba servisu públiku báziku ne'ebé presta ba populasaun.

Protokolu Kooperasaun ba Dezenvolvimentu no Implementasaun Programa REVIVE ho objetivu atu promove no halais prosesu rekuperasaun, prezervasaun no rentabilidade patrimóniu públiku ho valór patrimoniál, kulturál, istóriku no arkitetóniku aas, nune’e ninia transformasaun sai hanesan ativu ekonómiku ba benefísiu nasaun nian, hodi halo ida-ne'e sai apropriadu ba atividade ekonómika sira ne'ebé iha relasaun ho setór turizmu.

****

Konsellu Ministrus aprova ona projetu Rezolusaun Governu nian, ne'ebé aprezenta mós hosi Ministru Negósius Estranjeirus no Kooperasaun, kona-ba Protokolu Kooperasaun entre Governu Repúblika Demokrátika Timor-Leste no Ismaili Imamat, ne'ebé asina iha Lizboa iha loron 17 fulan-outubru tinan 2024.

Protokolu ida-ne'e ho objetivu atu estabelese lasu kooperasaun no promove troka informasaun no konsultas entre parte sira, ho hanoin atu promove valór komún sira iha forum internasionál no rejionál, hanesan dignidade umana, dezenvolvimentu sosiál no ekonómiku, diálogu interrelijiozu no rezolusaun konflitu ho dalan pasífika, ne’ebé kontribui ba promosaun justisa no dame.

Ismaili Imamat no ninia instituisaun dependente sira, hanesan Rede Aga Khan ba Dezenvolvimentu, iha misaun atu promove kualidade moris ne'ebé di'ak liu, la  distinge fiar, orijen ka jéneru, promove inisiativa iha área sira hanesan edukasaun, saúde, kultura, dezenvolvimentu rurál, habitat umanu, resposta ba krize, mikrofinansiamentu, dezenvolvimentu ekonómiku no hametin instituisaun sosiedade sivíl nian.

 ****

Ikusliu, Konsellu Ministrus delibera hodi autoriza selebrasaun ba Akordus Kontribuisaun Finanseira entre Repúblika Demokrátika Timor-Leste no Banku Aziátiku Dezenvolvimentu ba Projetu “Rural Resilience and Livehood Improvement Sector Project ”, ho valór totál millaun 16.588, ho nomeia Ministra Finansas hodi, lori Governu Timor-Leste nia naran, asina akordus ne’ebé temi ona. REMATA