Ministériu Edukasaun Timor-Leste, ne’ebé reprezenta hosi Ministra Dulce de Jesus Soares, akompaña hosi ninia delegasaun, partisipa iha Semináriu Internasionál ba da-3 kona-ba Prátika Di’ak iha Alimentasaun Eskolár no Konferénsia Altu Nivel, ne’ebé hala’o iha loron 3 to’o 5 fulan-dezembru tinan 2024, iha São Tomé e Príncipe. Eventu ne’e promove iha ámbitu prezidénsia rotativa São Tomé no Prínsipe nian ba Komunidade País Lian Portugés (CPLP, sigla iha lian portugés), halibur reprezentantes husi Estadu-membru sira hodi debate estratéjia inovadora no sustentável ba programa sira alimentasaun eskolár nian. 

Ho tema “Juventude no Sustentabilidade iha CPLP”, semináriu ne’e foka ba troka esperiénsia kona-ba inisiativa sira ne’ebé integra nutrisaun eskolár ho produsaun lokál, hodi promove dezenvolvimentu ekonómiku, saúde no edukasaun. Ekipa tékniku Timor-Leste ne’e destaka avansu sira husi Programa Merenda Eskolár, ho tema “Dezafiu, Oportunidade, Estratéjia no Solusaun sira: Programa Alimentasaun Eskolár versus Edukasaun Alimentár no Nutrisionál no Alimentasaun Saudavel no Sustentável”, hodi destaka mós papél husi instituisaun relevante sira, inkluzaun produtu lokál sira iha menu eskolár sira no esforsu atu hametin “horta pedagójica”, no mós monitorizasaun no avaliasaun ba implementasaun Programa Merenda Eskolár.

Aleinde diskusaun sira, eventu ne’e hetan partisipasaun hosi Ministra Edukasaun Timor-Leste, Dulce de Jesus Soares, no membru governu sira seluk hosi Edukasaun CPLP nian iha Konferénsia Altu Nivel ne’ebé organiza hosi Programa Alimentár Mundiál (WFP), ne’ebé aprezenta Koligasaun Alimentasaun Eskolár hanesan plataforma ida ba kooperasaun globál. Governante Timor-Leste ne’e mós partisipa iha plenária ho tema “Husi Kompromisu sira ba Progresu: Kompromisu Nasionál iha Asaun”, iha ne’ebé aprezenta progresu sira ne’ebé hala’o husi Estadu-membru sira iha implementasaun kompromisu sira Koligasaun nian ba Alimentasaun Eskolár.

Konferénsia Altu Nivel ne’e mós marka ho asinatura Deklarasaun Adezaun ba Koligasaun Alimentasaun Eskolár, ne’ebé asina hosi Ministrus Edukasaun Estadus-membru CPLP nian, ka hosi sira-nia reprezentante sira, iha ámbitu Konferénsia Altu Nivel kona-ba Koligasaun Alimentasaun Eskolár. 

Partisipante sira iha Konferénsia Altu Nivel CPLP nian kona-ba Alimentasaun konklui no rekomenda tuirmai ne’e:

1. Programa alimentasaun eskolár rekoñese ona hanesan fundamentál iha luta hasoru moris-ki’ak, hamlaha no dezigualdade, tanba programa ne’e promove asesu ba edukasaun, ekuidade sosiál no jéneru; defende agrikultór lokál sira no sistema ai-han sira; apoia reziliénsia klimátika; kria empregu foun; no dudu kreximentu ekonómiku no prosperidade.
2. Programa alimentasaun eskolár rekoñesidu ona nu’udar prinsipál aseleradór hodi alkansa ODS.
3. Refeisaun eskolár hetan rekoñesimentu nu’udar investimentu estratéjiku ida, hanesan rede seguransa ai-han ne’ebé boot liu iha maioria país sira CPLP nian, tanba fornese transferénsia rekursus (osan no sasán) ba família vulneravel iha área sira ho asesu difisil, hodi transforma eskola sira sai pontu prinsipál dezenvolvimentu no ativa demanda lokál ba ai-han sazonál, lokál no fresku.
4. Ha’u haksolok ho adezaun Estadus-membrus CPLP nian, nu’udar organizasaun ida, ba Koligasaun Alimentasaun Eskolár no enkorajamentu iha kontinuasaun koordenasaun ho objetivu atu aprezenta kompromisu rejionál sira ba Sekretariadu SMC.
5. Sensibilizasaun ba Estadus-membrus atu prepara no submete kompromisu nasionál sira ba Sekretariadu SMC, molok Simeira Globál tuirmai, ne’ebé prevee ona ba fulan-setembru tinan 2025 iha Brazil.
6. Sensibilizasaun ba Estadus-membrus kona-ba importánsia kobertura universál ba programa sira-ne’e, iha tempu ne’ebé badak liu, bazeia ba impaktu oioin ne’ebé programa refeisaun eskolár iha ba labarik sira-nia edukasaun no nutrisaun, no mós efeitu indiretu sira ba tesidu ekonómiku komunidade eskolár sira nian.
7. Sensibilizasaun ba Estadus-membrus CPLP hodi promove medida sira ne’ebé hasa’e kualidade refeisaun eskolár ne’ebé prodús lokalmente, ho objetivu konkretu atu duplika númeru labarik sira ne’ebé simu refeisaun eskolár loron-loron to’o tinan 2030 no, hein katak, alkansa kobertura universál, iha ámbitu Global Alliance Sprint Action.
8. Subliña importánsia eskola sira nu’udar sentru dezenvolvimentu nian, liuliu kona-ba: a. kompras lokál; b. dotasaun orsamentu; c. hadi’a nutrisaun (to’os eskolár sira); d. enerjia ba seguransa ai-han (uza painél solár no eólico (anin) nian, troka ai-sunu ho gás, hili fogaun ekolójiku sira); e. reabilitasaun infra-estrutura (hadi’a/harii sentina, bomba bee, dapur, armazén, refeitóriu); no f. materiál didátiku, no seluk tan.
9. Enkoraja parserias ho ajénsias Nasoins Unidas nian, doadór no organizasaun sira sosiedade sivíl nian (UNICEF, UNESCO, FAO, BAD, FIDA, Kooperasaun Portugeza, UE, no sira seluk).
10. Destaka importánsia hosi Kooperasaun Súl-Súl no Norte-Súl entre país sira ho nivel implementasaun programa alimentasaun eskolár ne’ebé la hanesan, hodi fahe esperiénsia sira kona-ba enrikesimentu ba malu.
11. Enkorajamentu ba Estadus-membrus CPLP no Sekretariadu Ezekutivu CPLP nian hodi buka mekanizmu finansiamentu ne’ebé inovativu, hanesan troka dívida ba alimentasaun eskolár, eskema sosa fali dívida, fundu ne’ebé vinkuladu ho impostu no doasaun, no empréstimu adisionál ba programa alimentasaun eskolár.

Timor-Leste nia partisipasaun reafirma kompromisu nasaun nian ho Objetivu Dezenvolvimentu Sustentável (ODS), liuliu iha área edukasaun no seguransa ai-han. Troka prátika di’ak sira ho nasaun CPLP sira seluk hametin polítika nasionál no kontribui ba alimentasaun ida ne’ebé saudavel no inkluzivu liu ba estudante timoroan sira.

Lisaun ida ne’ebé aprende hosi Brazil no Portugál mak inkluzaun nutrisionista sira iha edukasaun, liuliu kona-ba alimentasaun eskolár.

Nutrisionista sira hala’o papél krusiál ida hodi dezenvolve planu alimentár sira ne’ebé ekilibradu, hodi ajuda hadi’a kualidade edukasaun nian no prevene moras sira ne’ebé relasiona ho alimentasaun ne’ebé ladi’ak.

Iha eskola sira, inkluzaun husi nutrisionista bele garante katak labarik sira hetan orientasaun klaru kona-ba eskolla ai-han saudavel.