Ministru Transportes no Komunikasoins, Miguel Marques Gonçalves Manetelu, lidera delegasaun nasionál ida iha kompromisu ofisiál importante sira iha Vietname no Malázia, hodi hametin kooperasaun internasionál no reprezenta Timor-Leste iha diskusaun estratéjiku sira iha área transportes no teknolojia dijitál. 
Iha loron 19 fulan-novembru tinan 2024, Ministru tuir abertura Semana Dijitál Internasionál Vietname nian ne’ebé hala’o iha Ha Long. Eventu ida-ne’e halibur lider governu nian, peritu no empreza sira hodi debate kona-ba avansu sira iha transformasaun dijitál, ho énfaze ba aplikasaun teknolojia emerjente sira, hanesan intelijénsia artifisiál no 5G.
Durante meza redonda ministeriál, Ministru Miguel Manetelu ko’alia kona-ba progresu no dezafiu sira Timor-Leste nian iha dijitalizasaun servisu públiku, subliña katak nasaun ne’e hahú ona implementa asisténsia virtuál, maski hasoru limitasaun iha infraestrutura telekomunikasaun no formasaun rekursus umanus. Iha nia diskursu, nia destaka importánsia hosi kompletasaun fiu fibra ótika submarinu nian, ne’ebé prevee ona ba inísiu tinan 2025, hanesan marku esensiál ida hodi aumenta konektividade no promove inovasaun teknolójiku iha nasaun ne’e. 
Delegasaun nasionál, ne’ebé konstitui hosi reprezentante sira hosi Autoridade Nasionál Komunikasoins (ANC, sigla iha lian portugés), TIC Timor no Diresaun Nasionál Informasaun no Komunikasaun (DNIK), partisipa mós iha enkontru temátiku kona-ba polítika dijitál, konektividade no aplikasaun prátika sira intelijénsia artifisiál nian. Durante sesaun sira-ne’e, esplora oportunidade sira hodi atrai investimentu no estabelese parseria estratéjiku sira ne’ebé bele aselera transformasaun dijitál Timor-Leste nian.
Nafatin iha Vietname, Ministru Miguel Manetelu hala’o enkontru bilaterál ida ho Ministru Informasaun no Komunikasoins Vietname nian, Nguyen Manh Hung, iha ne’ebé nia reafirma importánsia kooperasaun entre nasaun rua ne’e. Ministru Vietname aprezenta inisiativa relevante sira iha área transformasaun dijitál, ekonomia dijitál no telekomunikasoins, no reafirma kompromisu Vietname nian hodi apoia Timor-Leste, inklui fó bolsa estudu anuál ba estudante timoroan sira iha universidade Vietname nian. Parte rua ne’e mós konkorda atu asina, iha Dezembru 2024, Memorandu Entendimentu ida ne’ebé sei hametin kolaborasaun iha setór informasaun no komunikasaun. 
Hafoin atividade iha Vietname, Ministru halo viajen ba Kuala Lumpur, Malázia, hodi partisipa, iha loron 21 no 22 fulan-novembru, iha Sorumutu Ministeriál Transportes ASEAN nian ba dala 30. Eventu ida-ne’e, konsidera hanesan forum nivel altu importante liu ba setór transportes iha rejiaun ne’e, halibur ministru sira hosi nasaun membru no parseiru sira ASEAN nian hodi diskute polítika no estratéjia sira ne’ebé ho objetivu atu hametin konektividade rejionál, hadi’a seguransa transporte nian no armoniza infraestrutura no regulamentu sira.
Timor-Leste, ho estatutu observadór, partisipa iha sesaun plenária sira hodi akompaña diskusaun no pontu importante-tebes ne’ebé diskute, hodi prepara-an ba integrasaun plena iha bloku rejionál. 
Ministru Miguel Manetelu subliña relevánsia hosi partisipasaun ida-ne’e, atu Timor-Leste bele aliña ninia polítika no estratéjia sira ho ezijénsia ASEAN nian, liuliu iha setór transportes. 
