Ministru Negósius Estranjeirus no Kooperasaun, Bendito dos Santos Freitas, reprezenta Timor-Leste iha Forum Globál Aliansa Sivilizasaun Nasoins Unidas (UNAOC, akrónimu iha lian inglés) nian ba dala 10, ne’ebé hala’o hosi loron 25 to’o 27 fulan-novembru tinan 2024, iha Cascais, Portugál. Eventu ida-ne’e, ho tema “Unidu ba Pás: Restaura Konfiansa, Harii fila-fali Futuru – Reflete kona-ba Dékada Rua Diálogu ba Umanidade”, marka aniversáriu ba dala 20 hosi fundasaun Aliansa Sivilizasaun nian. 

Durante Sorumutu Ministeriál Grupu Amigu sira husi UNAOC, iha loron 26 fulan-novembru, Ministru Bendito Freitas salienta katak Forum ida-ne’e nu’udar espasu privilejiadu ida ba buka solusaun hamutuk ba dezafiu globál sira. “Ita iha responsabilidade koletiva atu promove pás, hametin diálogu entre sivilizasaun sira, hasa’e respeitu ba malu no valoriza dignidade povu hotu-hotu nian”, nia afirma.

Iha ninia diskursu, nia ko’alia-liu kona-ba “Timor-Leste nia esperiénsia úniku” hodi hametin relasaun bilaterál no promove rekonsiliasaun nasionál no rejionál, ho afirma katak nasaun ne’e mak “ezemplu ida ne’ebé bele no tenke halo-tuir iha fatin oioin iha mundu ne’ebé konflitu nafatin iha”. Nia mós mensiona katak “Timor-Leste prova ona katak rekonsiliasaun ne’e posivel no katak dame, dame de’it, bele fó benefísiu ba parte hotu-hotu”. 

Ministru ne’e destaka mós kompromisu Timor-Leste nian ba valór sira husi Aliansa Sivilizasaun nian, hodi foka-liu ba apoiu nasaun nian ba Estadu sira seluk ne’ebé afetadu husi konflitu sira, liuhusi g7+, inisiativa ida ne’ebé promove husi Primeiru-Ministru Xanana Gusmão. Nia subliña mós adosaun ofisiál hosi Dokumentu kona-ba Fraternidade Umana, ne’ebé asina hosi Sua Santidade Papa Francisco no Saserdote Musulmanu al-Azhar, ne’ebé nia deskreve nu’udar “marka istóriku ida ba sivilizasaun – pasu jigante ida ba oin kona-ba diálogu interrelijiozu no intersivilizasionál”. 

Eventu ne’e hetan partisipasaun hosi lider altu nivel sira, inklui Sekretáriu-Jerál ONU, António Guterres, ne’ebé alerta kona-ba “konfiansa ne’ebé lakon iha sistema multilaterál no entre sosiedade sira”, no Prezidente Repúblika Portugál, Marcelo Rebelo de Sousa, ne’ebé lamenta ho aumentu intoleránsia globál. 

Iha serimónia enserramentu, Deklarasaun Cascais reafirma kompromisu Estadus-membrus nian hodi promove toleránsia, respeitu ba malu no kooperasaun internasionál, ne’ebé nu’udar elementu sentrál hodi hasoru dezafiu globál atuál sira.

Hafoin konferénsia ne’e, Ministru Negósius Estranjeirus sei akompaña Primeiru-Ministru Kay Rala Xanana Gusmão iha vizita ofisiál ba Malázia, ho objetivu atu hametin kooperasaun bilaterál no diskute kona-ba prosesu adezaun Timor-Leste nian ba ASEAN.