Iha semana kotuk, Timor-Leste kontinua ninia prosesu integrasaun rejionál no internasionál liuhusi realizasaun workshop rua ne’ebé dedika ba adezaun ba Asosiasaun Nasoins Sudeste Aziátiku (ASEAN) no ba Organizasaun Mundiál Komérsiu (OMC, sigla iha lian portugés). 

Husi loron 18 to’o 22 fulan-novembru, Ministériu Komérsiu no Indústria no Ministériu Negósius Estranjeirus no Kooperasaun (MNEK) organiza workshop ida kona-ba instrumentus jurídikus Komunidade Ekonómika ASEAN no OMC nian. Eventu ne’ebé hala’o iha Salaun Nobre MNEK ne’e ho objetivu atu avalia Timor-Leste nia progresu iha prosesu adezaun ba ASEAN no iha faze pós-adezaun ba OMC. Inisiativa ne’e lidera hosi Ministru Komérsiu no Indústria, Filipus Nino Pereira, no Vise-Ministra ba Asuntus ASEAN, Milena Maria da Costa Rangel, no inklui partisipasaun funsionáriu sira hosi Ministériu Komérsiu no Indústria no reprezentante sira hosi munisípiu oioin. 

Iha loron 25 no 26 fulan-novembru, reprezentante sira husi Timor-Leste no Malázia hasoru malu iha workshop ida ne’ebé hala’o iha Novo Turismo Resort & Spa Hotel, iha Dili, hodi diskute kona-ba progresu nasionál ba adezaun ba ASEAN. Sesaun sira foka liu ba Timor-Leste nia prontidaun atu adere ba instrumentu legál sira ASEAN nian, elementu prioridade ida hosi prosesu adezaun nian. Workshop ida-ne’e hetan partisipasaun husi Diretora-Jerál Sekretariadu Nasionál ASEAN-Malázia, Embaixadór Malázia iha Timor-Leste, Amarjit Sarjit Singh no Diretora-Jerál ba Asuntus ASEAN, Elisa da Silva. 

Eventu rua ne’e reforsa Timor-Leste nia esforsu atu avansa ninia kompromisus integrasaun rejionál no internasionál, hodi konsolida ninia pozisaun nu’udar atór ativu ida iha senáriu ekonómiku no diplomátiku globál.