Vise-Ministru Asuntus Parlamentares, Adérito Hugo da Costa, ohin, 25 fulan-novembru 2024, partisipa iha serimónia abertura ba Konkursu Promosaun Pesoál tuir Rejime Jerál Funsaun Públika nian, ne’ebé reprezenta Ministru Prezidénsia Konsellu Ministrus, Agio Pereira, ne’ebé tutela Komisaun Funsaun Públika (CFP, Sigla iha Lian Portugés). Eventu ne’e hala’o iha instalasaun CFP no sura ho prezensa husi personalidade oioin, inklui Prezidente Komisaun Funsaun Públika, Agostinho Letêncio de Deus, komisárius hosi CFP, Diretór-Jerál sira no reprezentantes instituisoins Estadu nian. 
Iha ninia diskursu, Vise-Ministru ko’alia-liu kona-ba importánsia hosi prosesu ida-ne’e atu valoriza prinsípiu méritu, transparénsia no imparsialidade iha administrasaun públika Timor-Leste nian. “Ho onra boot no sentidu responsabilidade maka ha’u partisipa iha serimónia ida-ne’e. Momentu ida-ne’e la’ós simboliza de’it kumprimentu obrigasaun administrativa ida, maibé mós kompromisu husi Governu Konstitusionál IX atu hametin funsaun públika nu’udar aliserse ba dezenvolvimentu ita-nia Estadu no halo servisu ho kualidade ba ita-nia populasaun”, afirma Adérito Hugo da Costa.
Konkursu ba tinan ida-ne’e envolve kandidatu hamutuk 7.654, inklui feto 1.837 no mane 5.817, ne’ebé kobre grau funsaun públika ne’ebé la hanesan. Prosesu no promosaun ida-ne’e inklui hala’o teste eletróniku sira no posibilidade atu hili área koñesimentu espesífiku sira, hanesan administrasaun no finansas, ekonomia sosiál no área téknika sira. Implementasaun ezame eletróniku sira hanesan marku ida ne’ebé garante imparsialidade no konfidensialidade boot liu, hodi promove kredibilidade sistema nian. 
Durante ninia intervensaun, Vise-Ministru hahí papél sentrál Komisaun Funsaun Públika nian hodi promove jestaun públika ne’ebé efisiente no étika, hodi afirma katak “Komisaun Funsaun Públika maka guardian ba prinsípiu méritu, imparsialidade no transparénsia, ne’ebé fundamentál ba susesu hosi konkursu ida-ne’e. Liuhusi serbisu rigorozu hosi komisaun ida-ne’e mak ita garante avaliasaun ida ne’ebé justu no imparsiál, hodi kontribui ba konstrusaun administrasaun públika ida ne’ebé motivadu no bele hatán ba dezafiu sira ita-nia rain nian.” 
Prezidente Komisaun Funsaun Públika, Agostinho Letêncio de Deus, reforsa katak konkursu promosaun ne’e ho objetivu la’ós de’it ba progresaun karreira, maibé mós atu rekoñese méritu no dedikasaun funsionáriu públiku sira nian. Dezde tinan 2019, funsionáriu públiku rihun ba rihun maka hetan benefísiu hosi modelu ida-ne’e, ne’ebé agora inklui opsaun sira hodi tuir ezame sira ‘online’, hodi permite asesibilidade boot liu, inklui ba funsionáriu sira ne’ebé serbisu iha rai-li’ur.
Vise-Ministru haktuir hikas kompromisu Governu IX nian atu garante prosesu sira ne’ebé transparente no bazeia ba méritu hodi hametin administrasaun públika. “Tenke haree ba promosaun ida-idak hanesan kompromisu renovadu hodi serbí povu timoroan, garante efisiénsia no responsabilidade. Konkursu ida-ne’e la’ós de’it oportunidade progresaun nian, maibé mós demonstrasaun ida kona-ba Estadu nia kompromisu atu rekoñese no valoriza méritu no kompeténsia husi ninia funsionáriu sira.” 
Adérito Hugo da Costa hakotu ninia diskursu ho dezeju “susesu boot ba kandidatu sira hotu” no hato’o ninia esperansa “katak konkursu promosaun pesoál ida ne’e sei sai hanesan demonstrasaun ida tan hosi ita-nia Estadu nia kompromisu ba governasaun di’ak no rekoñesimentu ba méritu imi hotu nian”.