Governu Timor-Leste

Prezidénsia Konsellu Ministrus

  Portavós Governu Timor-Leste

IX Governu Konstitusionál

...........................................................................................................................

Komunikadu Imprensa

loron 21 fulan-novembru tinan 2024

Patsy Thatcher nia moris iha ligasaun no envolvimentu ne’ebé kle’an tebetebes ho istória no povu Timor-Leste.

Nia kontributu boot ba istória ami-nia nasaun nian hahú iha 1981, bainhira nia hakarak dokumenta experiénsia husi militár australianu sira iha Timor durante Segunda Guerra Mundiál ho apoiu esensiál ne’ebé sira hetan husi povu timor. Liuhosi traballu ida-ne’e, nia publika kapítulu importante ida kona-ba ami hotu nia istória.

Entrevistas naruk ne’ebé Patsy halo ba soldadu sira husi 2/2º Eskaudraun Komandu hatudu ba públiku nia korajen ho reziliénsia. Nia traballu ne’e mós prezerva di’ak tebes agradesimentus ho laran tomak husi soldadu hirak-ne’e, ne’ebé bele garante sira-nia sobrevivénsia tanba asisténsia ne’ebé sira hetan husi sira-nia kompañeirus timoroan sira.

Husi traballu importante ne’e, Patsy luku kle’an loos iha timoroan sira-nia moris tomak iha diáspora, hodi dokumenta sira-nia experiénsias iha Austrália no prezerva istórias kona-ba sira-nia reziliénsia ho identidade. Kleur tebes ona mak Patsy hatudu kompromisu ba bein-estár ho kompreensaun kona-ba sosiedade timor. Nia servisu la hatene kole hodi hatutuan pasadu ho prezente, hodi explora dezenvolvimentu tranzitóriu Timor-Leste nian no oferese informasoens ho valór boot kona-ba ami-nia nasaun nia perkursu (ka dalan naruk). Liuhusi nia dedikasaun, nia prezerva partes esensiais husi ami-nia istória, nia hariku ami-nia kompreensaun kona-ba ami-nia kultura no hametin lasus entre Timor-Leste ho sira ne’ebé apoia nia dezenvolvimentu ho independénsia.

Patsy mak hanesan fundadora prinsipál Fundu Bolsas ba Oan Kiak, ne’ebé patrosina jovens timoroan 1000-resin, hahú husi eskola primária to’o remata ensinu sekundáriu. Programa ne’e hahú iha 1992 no kontinua to’o ohin-loron.

Nia halo parte Komité Timorense ba Bein-Estár, iha Assosiasaun Timorense iha Victoria nia okos, no liuhusi nia investigasaun nia tulun halo programa reagrupamentu familiar, ne’ebé permite timoroan 1000-resin iha Portugal bele hamutuk fali ho sira-nia famílias iha Austrália.

Nia orienta tan estudante universitáriu timoroan balu iha sira-nia tezes iha áreas hanesan antropolojia no sosiolojia.

Patsy Thatcher la’ós de’it kontadora istórias ho investigadora dedikada ida, liu ida-ne’e, nia hanesan Timor-Leste nia verdadeira amiga no “Tia” doben ida ba komunidade timor tomak, liafuan ne’ebé reflete domin boot, respeitu ho ligasaun ne’ebé nia partilla ho ema barak tebes.

Legadu Patsy nian ne’e sei kontinua inspira jerasoens aban-bainrua nian. Nia kontributus kruza (ka hasoru-malu) ho istória ami-nia nasaun nian no nia memória ami sei rai di’ak nafatin.

Vale Patsy.