Ministru Turizmu Komérsiu no Indústria, Gil da Costa Alves, ho Diretór Nasionál Turizmu Timor-Leste, José Dias Quintas, reprejenta Governu Timor-Leste, partisipa konferénsia Internasionál Turizmu nian iha sidade Kinabalu, Sabah-Malaysia, loron 4 to’o loron 6, fulan Outubro.

Objetivu hosi konferénsia internasionál ne’ebé partisipa hosi nasaun hamutuk 90 ne’e, atu oinsá bele buka hatene no koñese indústria turizmu iha nasaun ida-idak no bele dezenvolve diak liu. Konferénsia ne’e mós foka ba dezenvolvimentu inovasaun produtu no estratejia merkadu turizmu nian, atu bele garante setór públiku no setór privadu ba aproveita no hasae liután poténsia turizmu. Konferénsia ne’e mós atu analiza estratejia organizasaun ne’ebé susesu tiha ona iha negósiu iha área turizmu nian.

Matéria prinsipál ne’ebe diskute iha konferénsia ne’e mak hanesan, Mega Trend no Inovasaun. Mosu opinioens hosi espesialista sira kona-ba pontudevista tendénsia sira ba turizmu no kompreende fatór-fatór susessu ba produtu turizmu inovasaun.

Iha viajen Ministru Gil da Costa Alves no Diretór Turizmu, José Dias Quintas ne’e, hala’o mós sorumutu bilaterál ho Ministru Turizmu Malaysia nian, Datuk Seri Dr. Ng Yen Yen. Ajenda prinsipál iha sorumutu ne’e foka liu ba dezenvolvimentu Rekursu Umanus, Asisténsia Téknika no Investimentu rai-liur iha setór turizmu.

Ministru Turizmu Komérsiu no Indústria, Gil da Costa Alves, mós hasoru malu ho Sekretáriu-Jerál Organizasaun Nasoens Unidas Mundiál Turizmo nian (UNWTO), Taleb Rifai, iha Malaysia. Iha sorumutu ne’e, Taleb Rifai promete iha tinan oin mai UNWTO prontu fó tulun Timor-Leste atu organiza konferénsia internasionál kona-ba dezenvolvimetu turizmu.