Ministru Juventude, Desportu, Arte no Kultura, Nelyo Isaac Sarmento, partisipa iha Konferénsia Ministrus Juventude no Desportu Komunidade País Lian Portugés (CPLP, Sigla iha Lian Portugés) nian ba da-15, ne’ebé hala’o iha loron 12 to’o 16 fulan-novembru, iha Cascais, Portugál. Sorumutu ida-ne’e halibur ministru sira ne’ebé responsavel ba pasta Juventude no Desportu hosi Estadus-membrus CPLP 9 hodi reforsa kooperasaun no promove interkámbiu esperiénsias iha área juventude no desportu. 

Iha loron 14 fulan-novembru, konferénsia ne’e hetan rezultadu ikus ho adosaun Deklarasaun Finál ida, ne’ebé destaka rezolusaun importante ho impaktu diretu ba Timor-Leste no ba joven sira iha país luzófonu sira.Husi kompromisu sira ne’ebé halo, aprova ona rezolusaun ida ne’ebé rekoñese importánsia Desportu Eskolár no prevee hodi kria “Olimpíada Desportu Eskolár CPLP nian”. Inisiativa ida-ne’e, propoin hosi Kabuverde, sei analiza fali iha tinan 2025, iha Dili, iha sorumutu Komisaun Desportu tuirmai. 

Konferénsia ne’e konta mós ho kompromisu hosi paízes-membrus atu hala’o Jogu Desportu CPLP nian ba da-12 iha Timor-Leste, husi loron 17 to’o 27 fulan-jullu tinan 2025. Paízes-membrus kompromete atu fó apoiu ba inisiativa ida-ne’e, hodi garante kriasaun ba kondisoins téknikas, materiais no finanseiras ba ninia konkretizasaun. 

Sekretáriu Ezekutivu CPLP, Zacarias da Costa, subliña importánsia hosi juventude no desportu ba dezenvolvimentu sustentável CPLP nian, hodi afirma katak “envolvimentu ativu hosi joven sira hodi alkansa sosiedade ne’ebé sustentavel, inkluzivu no estavel ne’e maka fundamentál”. Zacarias da Costa destaka papél desportu nian, “tanba ninia universalidade”, hanesan “instrumentu ida ne’ebé relevante tebes atu kapasita, liga no eduka joven sira iha mundu tomak. Desportu ne’e kontribui hodi hasa’e kompriensaun kona-ba importánsia hosi dezenvolvimentu sustentável no promosaun legadu sosiál ida ne’ebé dura ba jerasaun atuál no jerasaun foun sira”. 

Entre rezolusaun sira seluk, destaka desizaun atu hala’o Bienál Kriadór Foin-sa’e CPLP tuirmai iha Kabuverde, iha tinan 2026, no aprova modelu finansiamentu foun ida ba atividades Juventude no Desportu. Hahú agora, kontribuisaun hosi Estadu-membru sira sei kanaliza ba Fundu Espesiál CPLP, medida ne’ebé, tuir diretór kooperasaun CPLP, Manuel Lapão, “sei permite ajilidade boot liu hodi kumpre obrigasoins finanseiras no sei kontribui ba sustentabilidade planu asaun sira Juventude no Desportu nian”. 

Timor-Leste nia partisipasaun ativa iha Konferénsia ne’e reforsa kompromisu nasionál ba juventude no promove desportu hanesan fatór dezenvolvimentu sosiál no kulturál. Atu sai uma-na’in ba Jogu Desportivu CPLP nian ba da-12, Timor-Leste reafirma nia papél nu’udar parseiru ne’ebé dedikadu hodi hametin lasu solidariedade entre povu sira ne’ebé ko’alia lian portugés no harii futuru ida ne’ebé inkluzivu liu ba foin-sa’e sira CPLP nian.