Ministru Komérsiu no Indústria, Nino Pereira, no Sekretária Estadu Igualdade, Elvina Sousa Carvalho, partisipa iha inaugurasaun “Loja Hakbiit Feto” iha Dili, espasu ida ne’ebé dedikadu ba empoderamentu ekonómiku feto timoroan sira nian, iha loron 5 fulan-novembru tinan 2024. 

Serimónia inaugurasaun ne’e, hala’o iha sede Rede Feto Timor-Leste iha Kaikoli, partisipa mós husi Embaixadór Uniaun Europeia iha Timor-Leste, Marc Fiedrich, no Prezidente Konsellu Administrasaun Rede Feto, Zélia Fernandes. Loja Hakbiit Feto ne’e kria hanesan parte ida husi projetu empoderamentu feto ne’ebé implementa husi ADRA (Ajénsia Adventista ba Dezenvolvimentu no Asisténsia) no Rede Feto, hetan apoiu finanseiru husi Uniaun Europeia, Ajénsia Austríaka ba Dezenvolvimentu no ADRA Austria. Inisiativa ida-ne’e ho objetivu atu promove produtu agríkola prosesadu no artezanatu husi grupu feto 15 husi munisípiu haat, hodi promove partisipasaun feto iha ekonomia lokál.

Iha ninia diskursu, Sekretária Estadu Igualdade, Elvina Sousa Carvalho, destaka impaktu pozitivu hosi inisiativa ida-ne’e hodi reforsa autonomia finanseira feto timoroan sira-nian: “Loja Hakbiit Feto hanesan konkista importante ida iha ita-nia luta hamutuk ba empoderamentu feto iha Timor-Leste. Fatin ida-ne’e hanesan oportunidade ida ba feto sira atu fa’an sira-nia produtu, hodi kontribui diretamente ba hadi’a moris-di’ak ba sira-nia família no ekonomia nasaun nian.”

Ministru Komérsiu no Indústria, Nino Pereira, realsa importánsia partisipasaun feto iha setór ekonomia hanesan etapa krusiál ida ba dezenvolvimentu sosiál no ekonomia país nian: “Luta feto sira iha setór ekonómiku maka faze foun ida ba esforsu atu fortifika família no ita-nia nasaun. Feto Timor-Leste tenke iha podér atu lidera no partisipa tomak iha ekonomia.” 

Embaixadór Uniaun Europeia, Marc Fiedrich, fó parabens ba feto sira ne’ebé envolve iha projetu ne’e, hodi destaka impaktu ne’ebé inisiativa sira hanesan ne’e iha ba dezenvolvimentu sustentável Timor-Leste nian: “Ho abilidade sira ne’ebé hetan no sira-nia servisu makaas, feto sira-ne’e transforma hela sira-nia moris no hasa’e ekonomia Timor-Leste nian. Ida  ne’e inspira tebes hodi haree saida maka bele mosu uainhira iha kompromisu no apoiu.” 

Loja Hakbiit Feto maka sei sai hanesan pontu referénsia ida ba komersializasaun produtu ne’ebé prodús hosi organizasaun sosiedade sivíl no grupu feto sira, hodi promove empreendedorizmu no independénsia finanseira ba sira-nia membrus. Iha serimónia ne’e, konvidadu sira bele vizita espozisaun produtus no partisipa iha demonstrasoins kulinária lokál, iha ne’ebé sira hetan konvite atu apoia servisu feto timoroan sira nian.

Inisiativa ida-ne’e hola parte iha projetu empoderamentu feto “Hakbiit Feto”, ne’ebé inklui formasaun iha literasia finanseira, jestaun ba kustus no dezenvolvimentu merkadu, ne’ebé permite atu feto sira sai independente no influente liután iha ekonomia lokál. Projetu ne’e finansia hosi Uniaun Europeia, Ajénsia Austríaka ba Dezenvolvimentu no ADRA Áustria.