Ministériu Komérsiu no Industria (MCI) realiza workshop  kona-ba Validasaun Polítika Nasionál Komérsiu no Revizaun Lejizlativa ba Adezaun iEPA (interim Economic Partnership Agreement) iha loron 17 fulan-Outubru tinan 2024  ko-organizadu entre MCI, Sekretariadu Ilhas Pasifikas (PIFS), no Ernest and Young (EY) ne’ebe hetan suporta husi EU Spirit Project. Prosesu konsultasaun ida ne’e halo ona iha fulan jullu tinan 2024, iha ámbitu prosesu adezaun Timor-Leste nian iha interim Economic Partnership Agreement ho Ilhas Pasífikas sira no Uniaun Europeia (Akordu interinu Parseria Ekonómika).

Iha semináriu ne’e, Ministru Komérsiu no Indústria  Nino Pereira agredese ba parte interesada  sira ne’ebe hatudu ona kompromisu no apoia Timor-Leste ba iha integrasaun merkadu globál. 

“Ita-boot sira-nia prezensa hatudu ita-boot sira-nia kompromisu atu apoia Governu Timor-Leste iha ita-nia esforsu sira atu integra iha merkadu globál, tanba ita-nia objetivu atu atrai investimentu privadu sira, atu diversifika ita-nia ekonomia liu fali dependénsia ba setór petróleu no gás, no atu kria empregu sira ne’ebé sustentável. Ami fiar katak implementasaun proativu ba orientasaun polítika ne’e esensiál ba Timor-Leste nia dezenvolvimentu ekonómiku ba tempu naruk, no atu alkansa indikadór ekonómiku sira ne’ebé estabelese hosi Programa Governu Konstitusionál da-IX no prioridade polítika sira ne’ebé estabelese ona”. dehan Ministru MCI

Ministru Nino Pereira  hateten inisiativa husi workshop ne’e hanesan parte signifikativu husi esforsu ne’ebé hala’o kleur ona iha emprendimentu oioin no asaun governu nian iha Timor-Leste tanba Timor-Leste sai hanesan parte ida ba Akordu Cotonou nu’udar membru Organizasaun Estadu Pasífiku, Karibe no Afrikanu (OACPS), no observadór ezekutivu ba Fórum Illa Pasífiku.

Inisiativa refere krusiál ba estratéjia Timor-Leste tanba Timor-Leste hasoru progresu oin-oin iha integrasaun komérsiu rejionál no globál, ne’ebé inklui implementasaun roteiru adezaun ba ASEAN iha tinan 2025.