Ministru Komérsiu no Indústria Nino Pereira hala’o sorumutuk bilaterál ho Ministru Turizmu no Ekonomia Kreativa Repúblika Indonézia  Sandiaga Salahuddin Uno iha vizita traballu ba Indonézia loron 29 Jullu 2024. 

Iha sorumutuk bilaterál ne’e Ministru Nino Pereira no Ministru Sandiaga Uno diskute oportunidade kooperasaun bilaterál iha area ekonomia kriativa entre nasaun rua no konvida atu partisipa eventu ne’ebé Governu Timor-Leste liuhosi Ministériu Komérsiu no Indústria sei hala’o iha tinan oin.

“Ita mós konvida Ministru Sandiaga atu bele partisipa iha programa international trade expo ne’ebé tuir planu Ministeriu Komérsiu no Indústria sei realiza iha tinan oin.” Dehan Ministru.

Ministru Nino Pereira no Ministru Sandiaga mós hanoin atu realiza eventu promosaun poténsia ekonomia rai rua nian no liuliu hametin relasaun entre povu husi nasaun rua nian.

Ministru Sandiaga promove maka’as interkonektividade iha ASEAN no konvida Timor-Leste atu hamutuk promove programa interkonektividade ba dezenvolvimentu turizmu.

Ministru Sandiaga mós hanoin atu ajuda Timor-Leste nia setor agrikultura espesifikamente iha produsaun kafé, tanba produtu kafé iha demanda aas iha merkadu Internasionál maibé menus produsaun.