……………………………………………………………………………………………………………
Komunikadu Imprensa
loron 4 fulan-novembru tinan 2024
Timor-Leste Hato’o Solidariedade ho Reinu España ba Inundasaun iha Rejiaun Valénsia
Governu Konstitusionál IX espresa ninia solidariedade kle’an ho Povu no Governu España ba inundasaun trájiku sira ne’ebé estraga rejiaun Valénsia hosi fulan-outubru nia rohan to’o inísiu fulan-novembru tinan 2024. Dezastre naturál ida-ne’e, ne’ebé hamosu hosi Depresaun Altitude Aas Izoladu (DANA), kauza udan boot ne’ebé rezulta ema 200 resin mate, maioria iha provínsia Valénsia, no destruisaun ba infraestrutura, uma no área agríkola sira.
Imajen sira ne’ebé hasai hosi programa europeu Copernicus nian hatudu magnitude hosi estragu sira, ho área luan sira ne’ebé hetan inundasaun no infraestrutura sira ne’ebé afetadu maka’as. Autoridade lokál sira kontinua hasoru dezafiu boot hodi tulun populasaun no rekupera área sira ne’ebé afetadu.
Lori Governu no Povu Timor-Leste nia naran, Portavós Governu Konstitusionál IX nian, Ministru Agio Pereira, espresa “laran-dodok tebes ba lakon trájiku ema nia vida no ba difikuldade boot tebes ne’ebé povu españól hasoru iha momentu ne’ebé nakonu ho susar no provasaun ida-ne’e”. Nia mós hatutan tan katak “ami-nia hanoin hamutuk ho vítima sira no sira-nia família, no ami rekoñese esforsu eroiku sira hosi ekipa salvamentu no profisionál sira ne’ebé kontinua tulun komunidade sira ne’ebé afetadu hosi katástrofe ida-ne’e”. REMATA