Vise-Primeiru-Ministru no Ministru Koordenadór Asuntus Ekonómikus, Ministru Turizmu no Ambiente Timor-Leste, Francisco Kalbuadi Lay, reprezenta Timor-Leste iha Sorumutu Ministrus Traballu ASEAN (ALMM) nian ba da-28, ne’ebé hala’o iha Singapura husi loron 27 to’o 31 fulan-outubru. Sorumutu  ida-ne’e prezide husi Ministru Maundobra Singapura, Tan See Leng, hetan partisipasaun husi Estadus-Membrus ASEAN, Timor-Leste, no reprezentantes husi Sekretariadu ASEAN, hodi selebra tinan 50 dezde enkontru dahuluk iha Jakarta, Indonézia, iha fulan-abríl tinan 1975. 

Prezidénsia ALMM, ne’ebé asume hosi Singapura to’o tinan 2026, foti tema “Hametin Reziliénsia no Promove Inovasaun”, ne’ebé foka ba apoiu Estadus-Membrus ASEAN hodi hasoru dezafius no aproveita oportunidade sira ne’ebé mosu hosi transformasaun lalais iha mundu serbisu nian.

Durante Sorumutu ba da-28, Ministrus Traballu ASEAN nian aprova matadalan no deklarasaun importante sira hodi hasoru dezafiu laborál iha futuru, hanesan Matadalan ba Protesaun Traballadores Migrantes no sira-nia Família iha Situasaun Krize, ne’ebé reafirma kompromisu ASEAN nian atu oferese apoiu durante krize no emerjénsia iha futuru. Deklarasaun kona-ba Seguransa no Saúde iha Serbisu hetan mós aprovasaun, ne’ebé destaka kompromisu atu kria ambiente serbisu ne’ebé seguru no sustentável, esensiál ba kreximentu ekonómiku ba tempu naruk.

Enkontru ne’e mós reforsa kompromisu ASEAN nian ho kooperasaun internasionál, liuliu ho parseiru diálogu “Plus Three” — Xina, Japaun no Koreia — ho objetivu atu hametin reziliénsia iha merkadu traballu no hasoru kestaun emerjente sira, hanesan serbisu iha plataformas dijitais, igualdade jéneru no seguransa iha serbisu.

Iha ninia diskursu, Francisco Kalbuadi Lay subliña importánsia hosi kooperasaun rejionál hodi hasoru mudansas globais iha merkadu traballu no destaka kompromisu Timor-Leste nian hodi harii ekonomia ida ne’ebé reziliente. Nia hatutan liu tan katak Timor-Leste komprometidu atu kolabora ho paízes ASEAN hodi dezenvolve polítika laborál inovativu ne’ebé promove dezenvolvimentu inkluzivu no sidadaun sira-nia moris-di’ak. 

Aleinde partisipa iha eventu ne’e, Vise-Primeiru-Ministru hasoru malu ho Ministru Negósius Estranjeirus Singapura, Vivian Balakrishnan, hodi ko’alia kona-ba apoiu kontínuu Singapura nian ba prosesu integrasaun Timor-Leste iha ASEAN. Balakrishnan rekoñese Timor-Leste nia potensiál, destaka ninia populasaun joven no kompromisu maka’as ba progresu rejionál. Kalbuadi Lay mós hala’o enkontru ida ho Ministru Maundobra Singapura, Tan See Leng, iha ne’ebé esplora parseria posivel sira iha dezenvolvimentu abilidade, seguransa iha serbisu no inovasaun polítika.