Governu Timor-Leste

Prezidénsia Konsellu Ministrus

  Portavós Governu Timor-Leste

IX Governu Konstitusionál

...........................................................................................................................

Komunikadu Imprensa

Sorumutuk Konsellu Ministrus nian iha loron 30 fulan-outubru tinan 2024

Konsellu Ministrus hala’o sorumutu iha Palásiu Governu, Dili, no aprova projetu Rezolusaun Governu nian ne’ebé estende, to’o loron 10 fulan-abríl tinan 2025, suspensaun ba ensinu, aprendizajen no prátika artes marsiais no enserramentu temporáriu ba fatin no instalasaun hotu-hotu ne’ebé destinadu ba ensinu, aprendizajen no prátika artes marsiais, ne'ebé inisialmente hetan aprovasaun hosi Rezolusaun Governu n. 17/2024, loron 24 fulan-abril.

Rezolusaun Governu nian ida-ne'e ho objetivu atu konsolida no reforsa pás sosiál ne'ebé alkansa ona husikedas fulan-novembru tinan 2023. Ho abordajen ida ne'ebé konsideradu no kontroladu, hakarak atu iha futuru, permite prátika artes marsiais nian iha de’it kontestu desportivu, hodi promove ezersísiu saudavel no kontribui ba edukasaun no formasaun sívika no umanista ba joven sira. Maibé, iha tempu ida-ne’e, nafatin mantein suspensaun ba ensinu, aprendizajen no prátika artes marsiais no enserramentu temporáriu ba ninia fasilidade sira.

Governu felisita populasaun, liu-liu joven sira, ba kolaborasaun ne’ebé sira presta ona hodi kumpre Rezolusaun Governu n. 17/2024, loron 24 fulan-abríl, ne’ebé kontribui tebes ba manutensaun orden no pás sosiál iha país laran tomak.

*****

Aprova mós projetu Dekretu-Lei, ne’ebé aprezenta hosi Ministru Prezidénsia Konsellu Ministrus, Agio Pereira, no hosi Prezidente Komisaun Funsaun Públika, Agostinho Letêncio de Deus, relasiona ho Rejime Promosaun bazeia ba antiguidade pesoál karreiras Administrasaun Públika nian.

Inisiativa lejizlativa ida-ne’e ne’e ho objetivu atu garante progresaun iha karreira ba sira ne’ebé, la konsege alkansa promosaun bazeia ba méritu iha tinan hirak ikus ne’e, tanba razaun oioin. Rejime ida-ne’e bazeia ba kritérius hanesan antiguidade, avaliasaun dezempeñu, idade, formasaun profisionál, prestasaun servisu iha áreas remotas, komportamentu di’ak no asiduidade. Diploma ne’e define katak promosaun ho antiguidade sei akontese tinan-tinan, sei hala'o liuhosi konkursu internu ne'ebé regula hosi Komisaun Funsaun Públika, ne'ebé determina vaga sira ne'ebé disponivel ba kada grau no kategoria profisionál.

Hein katak rejime promosaun ne’e bazeia ba antiguidade no sei hamenus estagnasaun iha funsionáriu públiku sira-nia karreira, hodi valoriza dedikasaun tinan naruk ba servisu públiku, liuliu ba sira ne’ebé hasoru difikuldade hodi partisipa iha kompetisaun konvensionál sira.

*****

Ikusliu, aprova projetu Rezolusaun Governu, ne’ebé aprezenta hosi Ministra Solidariedade Sosiál no Inkluzaun, Verónica das Dores, kona-ba kumprimentu rejime inskrisaun no obrigasaun kontributiva iha ámbitu Rejime Kontributivu Seguransa Sosiál nian.

Diploma ida-ne’e reforsa devér Estadu nian, ne’ebé konsagra ona iha artigu 56.º  Konstituisaun Repúblika nian, hodi organiza sistema seguransa sosiál ne’ebé proteje traballadór hotu-hotu nasaun nian, iha setór públiku no privadu, no asegura direitu ba seguransa no asisténsia sosiál. Estabelese hosi Lei n. 12/2016, loron 14 fulan-novembru, sistema seguransa sosiál ne’e vigora dezde tinan 2017 no define responsabilidade husi entidade empregadór sira, inklui inskrisaun traballadór sira nian no entrega fulan-fulan deklarasaun remunerasaun ba Institutu Nasionál Seguransa Sosiál (INSS).

Rezolusaun Governu ida-ne’e determina katak entidade hotu-hotu Administrasaun direta no indireta Estadu tenke regulariza inskrisaun ba sira-nia traballadór sira iha INSS to’o loron 15 fulan-novembru tinan 2024, nune’e mós submete deklarasaun remunerasaun mensál to’o loron 15 kada fulan. INSS sei fornese iha ninia website tabela sira ne'ebé presiza tuir online no, to'o loron 30 fulan-Novembru tinan 2024, sei aprezenta ba Konsellu Ministrus lista entidade sira ne'ebé iha  inkumprimentu.

Inkumprimentu ba Rezolusaun ida-ne’e halo sira ne’ebé responsavel ba servisu no entidades Administrasaun Estadu direta no indireta ne’ebé ho kompeténsia halo inskrisaun ba traballadór sira no entrega fulan-fulan Deklarasaun Remunerasaun iha responsabilidade sivíl, finanseira, reintegratória no dixiplinár, tuir kazu. REMATA. REMATA