Governu liu hosi Ministériu Turizmu Komérsiu no Indústria (MTKI) kontinua sosa nafatin produtu lokál ne’ebé mak agrikultór sira prodús, maibé presiza  agrikultór tomak garante kualidade no kuantidade produsaun, hateten Inspetora Jerál Alimentár no Ekonomia (IAE), Florentina Smith, iha Konferénsia Imprensa, Sexta, loron 08 fulan Outubru.

Produtu ne’ebé MTKI sosa hosi povu mak Hare no Batar, forekeli, koto, fore-rai fore-mungu. Hare no Batar barak liu hosi distritu hitu: Maliana, Vikeke, Suai, Lospalos, Baukau, Manufahi no Ainaro ho totál tonelada 2.000 agora dadauk iha armazen governu nian, iha Díli.

Inspetora mós hatutan katak, MTKI halo koperasaun ho Ministériu Edukasaun, Ministériu Saúde, Ministériu Solidariedade Sosiál atu distribui produtu hirak ne’e tuir pedidu ne’ebé sira iha.

IAE hatutan, prosesu sosa produtu lokál la’o di’ak. Iha fulan Outubru to’o Dezembru sei fo nafatin oportunidade ba fornesedór sira atu hatama produtu mai iha Governu. Atividade ida-ne’e, oras ne’e dadaun halo hela monitorizasaun, akompañamentu no inspesaun maka’as atu haree bainhira produtu ne’ebé tama mai kualidade no kuantidade la to’o Governu sei la simu.