Governu, liuhosi Ministériu Saúde, lansa ofisialmente Kampaña Nasionál kona-ba Planeamentu Familiár ho objetivu atu promove espasu partu tinan tolu hodi hamenus taxa mortalidade inan no labarik. Serimónia ne’e hala’o iha loron 25 fulan-outubru, hetan partisipasaun hosi Vise-Ministru Fortalesimentu Institusionál Saúde, José dos Reis Magno, no Vise-Ministru Operasionalizasaun Ospitais, Flavio Brandão Mendes de Araújo, no mós reprezentantes governu, korpu diplomátiku no parseiru internasionál sira. 
Iha ninia diskursu, Vise-Ministru José dos Reis Magno destaka katak “dadus husi Peskiza Saúde Demográfika tinan 2016 nian indika taxa mortalidade inan 195 ba kada 100.000 moris no taxa mortalidade neonatál bebé 52 ba kada rihun moris, ida ne’ebé aas liu iha Ázia. Atu rezolve dezafiu ida-ne’e, espasu partu tinan tolu maka hanesan estratéjia ida ne’ebé importante tebetebes hodi hadi’a saúde inan no oan nian.” Kampaña, ho tema “Di’ak ba Ha’u, Família, Komunidade no Nasaun”, hetan apoiu tékniku no finanseiru hosi Fundu Nasoins Unidas ba Populasaun (UNFPA) no Governu Japaun. 
Embaixadór Japaun, Tetsuya Kimura, reforsa kompromisu Japaun nian hodi apoia saúde inan no labarik iha Timor-Leste, hodi hateten katak “hadi’a saúde inan nian mak esensiál ba sobrevivénsia no kreximentu labarik sira nian, no ami kompromete ona ba esforsu ida ne’e dezde tinan 2002.”
Bruce Campbell, reprezentante UNFPA iha Timor-Leste, hateten katak “espasu tinan tolu entre partu sira kontribui maka’as ba nutrisaun ida ne’ebé di’ak liu no dezenvolvimentu edukasionál ba labarik sira, aleinde hamenus taxa mortalidade infantíl. Investimentu ida-ne’e promove futuru ida ne’ebé nabilan liu ba inan, labarik no komunidade sira.” 
Atu kompleta inisiativa sira iha saúde inan no labarik nian, Ministériu Saúde, iha kolaborasaun ho Organizasaun Mundiál Saúde (OMS) no UNICEF, foin lalais ne’e konklui revizaun abranjente ida ba Programa Alargadu Imunizasaun (PAI) no Vijilánsia ba Moras ne’ebé bele Prevene ho Vasinasaun (VPD). Revizaun ida-ne’e, hala’o hosi loron 14 to’o 25 fulan-outubru, ne’ebé ofisialmente taka iha serimónia ida ne’ebé hala’o iha Dili, iha loron 25 fulan-outubru, no partisipa husi Ministra Saúde, Elia dos Reis Amaral, reprezentante OMS iha Timor-Leste, Arvind Mathur, no parseiru internasionál sira seluk. Durante eventu ne’e, Ministra destaka katak “vasina sira dezempeña ona papél sentrál ida hodi hadi’a saúde públika iha Timor-Leste, hasa’e esperansa moris liu dékada ida no kontribui ba eliminasaun moras sira hanesan tétanu maternu no neonatál, póliu, sarampu no rubéola.” 
Prosesu revizaun ne’e hamosu rekomendasaun estratéjiku sira hodi hametin kobertura vasinasaun no vijilánsia ba moras iha Timor-Leste laran tomak, inklui introdusaun vasina foun sira no hametin kadeia malirin no jestaun rezíduu.
Aleinde ne’e, entre atividade sira foin lalais ne’e hosi Ministériu Saúde, destaka workshop rua ne’ebé hala’o iha semana kotuk: dahuluk, iha loron 25 fulan-outubru, foka ba planeamentu akizisaun ai-moruk no produtu médiku sira, ne’ebé organiza hosi Diresaun Nasionál Farmásia no Produtu Médiku ho apoiu husi Departamentu Negósius Estranjeirus no Komérsiu Austrália (DFAT); no daruak, hala’o iha loron 28 fulan-outubru, foka ba Avaliasaun Esterna Konjunta ba área téknika 19 husi regulamentu sanitáriu internasionál. Eventu rua ne’e hetan partisipasaun husi Vise-Ministru Fortalesimentu Institusionál Saúde, José dos Reis Magno no ho objetivu atu hadi’a prosesu akizisaun no haforsa kapasidade resposta saúde públika nian iha Timor-Leste. 
