Centro de Convenções de Díli, hosi loron 23 to’o 25 fulan-outubru tinan 2024, sai uma-na’in ba Konferénsia Nasionál Dalimak kona-ba Alterasaun Klimátika. Sesaun abertura ne’e prezide husi Prezidente Autoridade Turizmu Timor-Leste (ATTL, IP), Virgilio Simith, reprezenta Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay. Organiza hosi Ministériu Turizmu no Ambiente iha kolaborasaun ho Grupu Traballu kona-ba Mudansa Klimátika, konferénsia ne’e halo parte iha selebrasaun Loron Nasionál Ambiente, ne’ebé selebra iha loron 25 fulan-outubru. 

Ho lema “Hamutuk ita apoia resposta globál ba ameasa mudansa klimátika, hametin asaun klimátika atu harii reziliénsia iha Timor-Leste”, konferénsia ne’e subliña nesesidade ba resposta konjunta ida hodi hasoru dezafius ambientais, promove asaun sira ne’ebé hametin reziliénsia no prezervasaun ambientál.

Iha diskursu abertura, Virgilio Simith, lori Vise-Primeiru-Ministru Francisco Kalbuadi Lay nia naran, hato’o “agradesimentu ba partisipante sira, liuliu ba parseiru internasionál no nasionál sira, ne’ebé hola inisiativa ida-ne’e hodi fahe esperiénsia kona-ba alterasaun klimátika, iha tempu ne’ebé Timor-Leste hasoru dezafius ambientais sériu ne’ebé tau nasaun ne’e iha risku nia laran.” Prezidente ATTL mós husu ba “organizasaun internasionál no nasionál sira no populasaun tomak atu kolabora ho Estadu iha luta hodi hamenus ameasas hosi mudansa klimátika iha Timor-Leste.” 

Konferénsia ne’e hetan partisipasaun hosi reprezentantes organizasaun internasionál no nasionál, funsionárius governamentais, líderes komunitárius no estudantes, ne’ebé diskute kona-ba estratéjia no inovasaun atu hamenus efeitu sira hosi mudansa klimátika iha nasaun ne’e, no subliña kompromisu hamutuk atu hametin reziliénsia klimátika iha Timor-Leste. 

 Virgilio Simith hato’o mós ba joven sira ne’ebé marka prezensa, hodi enkoraja sira atu habelar koñesimentu ne’ebé hetan iha komunidade rurál sira nia leet, promove kultura prezervasaun no respeitu ba natureza. “Ita hotu presiza dezenvolve espíritu prezervasaun, konservasaun no kuidadu ba ambiente, hadomi natureza ho fuan no laran no sai belun ho natureza”, nia afirma.  

Durante loron tolu eventu ne’e, partisipante sira envolve iha atividade oin-oin, inklui seminárius, kuda ai-horis no espozisoins, ne’ebé reforsa kompromisu Timor-Leste nian ba asaun sira hodi kombate mudansa klimátika no promove sustentabilidade ambientál.