Sorumutu estraordináriu Konsellu Ministrus loron 8 fulan Outubru 2010
GOVERNU KONSTITUSIONAL BA DA-IV
SEKRETARIA ESTADU KONSELLU MINISTRU
.............................................................................................................................................
KOMUNIKADU IMPRENSA
Sorumutu estraordináriu Konsellu Ministrus loron 08 fulan Outubru 2010
Konsellu Ministrus hala’o sorumutu estraordinariu iha Sexta,loron 8 Outubru 2010, iha Balibar, no analiza tiha:
1. Aprezentasaun Polítika atu muda Ajente Administrasaun nian sai hikas Funsionáriu Públiku
Hanesan preokupasaun ida atu garante futuru ida estável ba funsionáriu Estadu nian, mak Governu hakarak adopta mekanizmu hirak adekuadu liu atu hamenus proporsaun ajente administrasaun nian ne’ebé aas (maibé la sura ho profesór sira) relasiona ho funsionariu públiku sira (permanente) iha Funsaun Públika, iha Timór.
Ba ida-ne’e, Konsellu Ministrus analiza tiha ona proposta ne’ebé hato’o hosi Komisaun Funsaun Públika (CFP). Proposta ida-ne’e nia objetivu mak atu hetan ekilibriu entre direitu funsionáriu sira nian no nesesidade hosi organizasaun sira nian, hodi haree mós ba osan hirak gasta ona no dezenvolvimentu ne’ebé estável no sustentável hosi Funsaun Públika, iha Timor-Leste, tuir lei hirak ne’ebé mak uza hodi kria no jere Funsaun Públika ne’e. Hakarak mós atu harii baze ba futuru jestaun iha empregu temporáriu Administrasaun Públika nian liu hosi hahalok ida atu hadi’a polítika hirak kona-ba empregu no prátika jestaun, hodi evita hala’o kontratu ho ema barak hodi sai funsionariu temporáriu.
Defini tiha ona liña orientadora balun ba prosesu atu muda ajente administrasaun (maibé la sura ho profesór sira) ba fali funsionáriu públiku. Bazeia ba liña orientadora hirak Konsellu Ministrus defini tiha ona ne’e, mak Komisaun tenki formula hikas fali ninia proposta hodi iha tempu ida laran, bele aprezenta ba Governu.
2. Orsamentu Jerál Estadu (OGE) ba 2011
Konsellu Ministrus analiza no debate tiha ona ho detalladu kona-ba OGE 2011 hosi Ministériu sira no hosi Komisaun Nasionál Eleisaun nian, hodi haree ba konteúdu hosi ninia aprezentasaun, ba Konsellu Ministrus no tuir mai atu submete ba iha Parlamentu Nasionál, iha loron 15 fulan Novembru oin mai.
Iha Konsellu Ministrus oin mai, loron 13 fulan ida-ne’e nian, sei analiza hikas fali kestaun ne’e.
