Timor-Leste simu karta agradesimentu husi Sua Santidade Amu-Papa Francisco, ne’ebé dirije ba Primeiru-Ministru, Kay Rala Xanana Gusmão, iha ne’ebé Santu Padre hato’o agradesimentu kle’an ba resesaun ne’ebé di’ak no apoiu ne’ebé fó durante Vizita Apostólika mai Timor-Leste, ne’ebé hala’o hosi loron 9 to’o 11 fulan-setembru tinan 2024. Vizita istórika ida-ne’e, parte husi Viajen Apostólika ba Ázia, nu’udar momentu bensan no inspirasaun boot ida ba povu Timór.

Iha mensajen ne’e, Papa Francisco espresa ninia ksolok ba loron sira ne’ebé nia pasa iha país ne’e, hodi afirma katak “fila fali ba Roma ho fuan ne’ebé kontente kona-ba loron sira ne’ebé ha’u hela iha Timor-Leste, ha’u mai atu hato’o hikas ha’u-nia agradesimentu ba Primeiru-Ministru no, liuhosi nia, ba sira ne’ebé iha dalan ida ka seluk kontribui hodi halo ha’u nia Viajen Apostólika ba Nasaun ne’ebá sai posivel no fó rezultadu. Santu Padre hato’o agradesimentu “ba ida-idak”, hodi rekoñese esforsu koletivu sira ne’ebé kontribui ba susesu ninia vizita nian.

Durante nia estadia, Papa Francisco simu ho entuziazmu hosi populasaun timoroan, ne’ebé nakonu iha estrada sira hodi hatudu fiar no devosaun nian, no pontu importante liu mak iha selebrasaun Santa Misa iha Tasi Tolu. Eventu ida-ne’e, enkontru relijiozu boot liu ne’ebé hala’o iha Timor-Leste, halibur sarani rihun 600 resin, kuaze metade hosi populasaun nasionál, hodi hametin espíritu unidade no fiar ne’ebé karakteriza

 povu timoroan nian.

Papa Francisco mós destaka Timor-Leste nia foin-sa’e sira, hodi refere ba jerasaun ida-ne’e nu’udar nasaun nia esperansa: “Imi-nia rain mak nasaun foin-sa’e ida ne’ebé iha ninia forsa no ninia futuru iha ninia foin-sa’e sira. Ha’u sente impresionadu tebes atu haree joven barak iha ne’ebé de’it ha’u bá no, liuliu, durante enkontru iha loron 11 fulan-setembru iha Centro de Convenções”. Papa enkoraja papél Governu nian hodi kria “pájina foun ida, furak no util, iha istória Nasaun nian”, Santu Padre mós husu “bensan barak” no hato’o “dezeju  susesu” ba Primeiru-Ministru “iha knaar ne’ebé hala’o no iha koordenasaun ekipa governamentál.”

Governu Timor-Leste simu ho gratidaun mensajen Papa Francisco nian no reafirma nia kompromisu atu promove valores dame, unidade no dezenvolvimentu nian, no hatudu prinsípiu sira ne’ebé sai hanesan baze ba sosiedade timoroan. Vizita Apostólika ne’e nu’udar marku rekoñesimentu internasionál ida, hodi hametin Timor-Leste nia pozisaun nu’udar promotór diálogu no dame iha palku globál.