Governu Provínsia Hunan, Xina, liuhosi nia Vise-Governadora, Zhang Yingchun, ofisialmente entrega ambulánsia tolu ba Munisípiu Manatutu. Serimónia entrega, ne’ebé hala’o iha loron 25 fulan-outubru liubá, iha Hunan, marka prezensa hosi Ministru Administrasaun Estatál, Tomás do Rosário Cabral, ne’ebé simu karreta sira ne’e hodi munisípiu nia naran. 

 Doasaun ne’e atu hatán ba kompromisu ne’ebé halo hosi Governu Provínsia Hunan, Xina, durante vizita Vise-Governadór, Zhang Jian Fei, ba Manatutu, iha loron 4 no 5 fulan-maiu tinan ida-ne’e, bainhira parte rua selebra aniversáriu parseria amizade entre Hunan no Manatutu ba dala sanulu. Oferta ne’e ho objetivu atu reforsa kapasidade munisípiu no apoia sistema saúde lokál.

Durante vizita ofisiál ba Hunan, Ministru Tomás do Rosário Cabral no ninia delegasaun partisipa mós iha abertura ba Espozisaun Internasionál Mákinas Agríkolas tinan 2024, eventu ida ne’ebé halibur reprezentantes kuaze hosi nasaun 50, hosi loron 26 to’o 28 fulan-outubru iha Sentru Internasionál ba Konvensoins no Espozisoins Changsha, iha Hunan, Xina. 

Relasaun entre Timor-Leste no Xina, ho abut istóriku, metin ona durante tinan barak nia laran, liuliu liuhosi kooperasaun entre munisípiu Manatutu ho provínsia Hunan, hodi hamosu projetu sira iha área oioin.

Serimónia ne’e marka mós prezensa husi Embaixadór Timor-Leste ba Repúblika Populár Xina, Loro Horta, no mós prezidente Autoridade Munisipál Manatutu no Baucau, Luís Inácio Henriques Fernandes no Veneranda Eurico Marques Lemos Martins.