Vise-Ministru Fortalesimentu Institusionál Saúde nian, José dos Reis Magno, prezide, iha loron 18 fulan-Outubru tinan 2024, iha abertura Semináriu Nasionál Revizaun Lista Medikamentu Esensial sira, ne’ebé hala’o iha Hotel Timor. Inisiativa ne’ebé hala’o durante loron tolu, organiza hosi Diresaun Nasionál Farmásia no Medikamentus, ho kolaborasaun ho Organizasaun Mundiál Saúde (OMS). 

Objetivu prinsipál husi Semináriu ne’e mak atu hasa’e kualidade husi servisu saúde ne’ebé presta ba populasaun, ho aprezentasaun husi edisaun dahaat husi lista ai-moruk esensiál, revizaun no atualiza kompletamente. Dokumentu ida-ne’e maka rezultadu hosi prosesu konsultativu ida ne’ebé komprensivu ne’ebé envolve profisionál saúde sira hosi nasaun tomak, ne’ebé reflete nesesidade terapéutiku atuál sira no rekomendasaun sira OMS nian. 

Durante nia diskursu, vise-ministru José dos Reis Magno destaka importánsia atu kontinua atualiza ai-moruk sira ne’ebé disponivel, hodi afirma katak “ai-moruk sira iha papél importante iha prestasaun servisu saúde nian, tanba ne’e esensiál atu hili ai-moruk sira ne’ebé povu timoroan presiza duni. .” Nia destaka mós katak selesaun ne’e hala’o “tuir rekomendasaun OMS nian no espesifisidade sira Timor-Leste nian”, hodi mantein katak eskolla ida ne’ebé adekuadu ba ai-moruk esensiál sira “sei simplifika jestaun ba fornesimentu ai-moruk nian.”

Vise-ministru garante mós katak lista foun hosi ai-moruk esensiál sira, ne’ebé hanesan rezultadu hosi prosesu konsulta boot ida ho profisionál sira saúde nasaun nian, “sei sai instrumentu importante ida iha jestaun ai-moruk nian iha teritóriu tomak” no katak sei “uza husi fornesedór kuidadu saúde hotu-hotu.” “Ministériu Saúde sei kontinua promove distribuisaun ekuitativa no disponibilidade ai-moruk esensiál sira iha nasaun laran tomak,” akresenta José dos Reis Magno. 

Iha semináriu ne’e hetan partisipasaun hosi médiku espesialista sira, diretór saúde munisípiu sira, entre profisionál sira seluk iha setór ne’e.