Governu hahú programa reflorestasaun ida iha munisípiu Aileu, Liquiça no Viqueque, ho inísiu ofisiál ne’ebé marka ho workshop ida ne’ebé hala’o iha semana liubá. Programa ida-ne’e, dezenvolve iha parseria ho Programa Nasoins Unidas ba Dezenvolvimentu (PNUD) no Fundu Verde Klima nian, ho objetivu atu hametin reziliénsia komunidade lokál nian ba mudansa klimátika liuhosi rekuperasaun área floresta sira no reforsu infraestrutura krítika sira. 

Durante workshop lansamentu ne’e, parseiru implementadór sira — RAEBIA, PERMATIL no Joint Venture PROSPEK & FRATERNA — aprezenta ba autoridade lokál sira, Ministériu Administrasaun Estatál, Ministériu Agrikultura, Pekuária, Peskas no Floresta, no mós reprezentante ONG nasionál no organizasaun internasionál sira, ajénsia sira husiNasoins Unidas nian no komunidade lokál sira, planu serbisu, kalendáriu atividade no estrutura organizasionál projetu nian. 

Inisiativa reflorestasaun ne’e sei abranje totál ektare 81, fahe iha munisípiu tolu: Aileu (ha 30), Liquiça (ha 21) no Viqueque (ha 30). Projetu ne’e la’os de’it promove rekuperasaun vejetasaun nativa, maibé mós sei kontribui ba protesaun infraestrutura 30 ne’ebé reziliente ba klima, inklui estrada rurál sanulu-resin-haat, sistema irigasaun lima, sistema bee neen no sistema protesaun rua hasoru inundasaun, rai-halai no erozaun.

Atu hametin infraestrutura sira ne’e no restaura kobertura vejetasaun, programa ne’e iha  objetivu atu proteje rikusoin no moris komunidade   besik na’in 42.655 ne’ebé hela iha área rurál munisípiu tolu ne’e nian. Inisiativa ne’e hakarak mós hasa’e kapasidade adaptasaun no reziliénsia komunidade nian hasoru impaktu sira hosi alterasaun klimátika, hodi garante sustentabilidade ba tempu naruk.

 Projetu ida-ne’e hanesan rezultadu husi kolaborasaun entre Ministériu Administrasaun Estatál no Ministériu Agrikultura, Pekuária, Peskas no Floresta, ho apoiu husi PNUD no Fundu Verde ba Klima, no iha parseria ho organizasaun implementadora sira ne’ebé envolve.