Ministru Prezidénsia Konsellu Ministrus, Agio Pereira, iha loron 22 fulan-outubru tinan 2024 hasoru malu ho Embaixadora Estadus Unidus nian iha Timor-Leste, Donna Ann Welton, iha sorumutu formál dahuluk entre país rua ne’e hafoin aprezentasaun kredensiál diplomata nian ba Prezidente Repúblika, José Ramos-Horta, iha fulan-jullu tinan ne’e. Iha sorumutu, ko’alia kona-ba oportunidade kooperasaun sira, ho objetivu atu hametin relasaun bilaterál no atu promove dezenvolvimentu sustentável iha Timor-Leste.
Embaixadora Welton hateten katak Estadus Unidus iha vontade atu kontinua kolabora ho Timor-Leste iha programa ne’ebé aliña ho prioridade IX Governu Konstitusionál nian, hanesan diversifikasaun ekonómika no hametin kapasidade nasionál. Liuliu, nia ko’alia kona-ba importánsia inisiativa iha área agrikultura no nutrisaun, ne’eb’e kompleta esforsu Governu Timor nian atu halakon desnutrisaun ba labarik sira no promove futura jerasaun nia moris-di’ak. 
Ministru Agio Pereira subliña katak desnutrisaun ba labarik sira sai hanesan preokupasaun sentrál Governu nian, ho koordenador asaun iha área ne’e maka Vise-Primeiru Ministru no Ministru Koordenadór Asuntu Sosiál sira. Iha sorumutu ne’e, nia foka liu kona-ba nesesidade abordajem integrada ne’ebé envolve ministériu no parseiru internasionál oioin, ho objetivu atu garante dezenvolvimentu saudável ba labarik timoroan sira.
Aborda mos projetu kooperasaun oioin ne’ebé mak hala’o hela inklui inisiativa iha infraestrutura, edukasaun no saúde públika, ne’ebé kontribui ona atu hametin parseria bilaterál. Entre tema sira ne’ebé diskute ona maka dezenvolvimentu ekonómiku ba prazu naruk nian no oportunidade atu dada investimentu sustentável ne’ebé apoia diversifikasaun ekonomia nasionál. Ministru ko’alia liu kona-ba progresu sira atu kria kondisaun ba investimentus iha setór estratéjiku sira hanesan agrikultura, indústria no turizmu, área ne’ebé esensiál atu hamenus dependénsia país nian ba rekursu fóseis no no atu fomenta kriasaun empregu, liuliu ba foinsa’e timoroan sira hotu.