Ministru Prezidénsia Konsellu Ministrus no Interlokutór iha diskusoens Greater Sunrise, Agio Pereira, hala’o sorumutu ohin, loron 22 fulan-outubru, iha Palásiu Governu, Dili, ho reprezentantes husi empreza petrolífera japoneza INPEX, hodi fó kontinuasaun ba diálogu estratéjiku kona-ba dezenvolvimentu projetu Greater Sunrise no oportunidade dezenvolvimentu iha Kosta Súl Timor-Leste nian. Marka prezensa iha sorumutu ne’e maka Chris Wilson, Vise-Prezidente Ezekutivu Operasoins INPEX, Yosuke Ueda, reprezentante INPEX iha Timor-Leste no Brodie Ryota Sugai, Konsultór Dezenvolvimentu Negósius. 
Ida-ne’e hanesan sorumutu datolu entre Ministru Agio Pereira no INPEX, hafoin sorumutu ne’ebé hala’o iha Dili, iha fulan-juñu, no iha Darwin, iha fulan-jullu tinan ne’e, ho objetivu atu esplora posiveis parserias iha dezenvolvimentu infraestruturas enerjétikas iha Timor-Leste, inklui potensiál Greater Sunrise.
INPEX, ne’ebé iha partisipasaun 9,6% iha Konsórsiu Bayu Undan, ofisialmente loke ona ninia eskritóriu iha Timor-Leste iha fulan-juñu liubá, hodi hatudu vontade atu habelar ninia atividade iha rejiaun ne’e. Rekoñesida hanesan empreza esplorasaun no produsaun petróleu no gás ne’ebé boot liu iha Japaun, INPEX iha esperiénsia kle’an iha setór enerjétiku globál, ho investimentu iha nasaun oin-oin, inklui Indonézia no Austrália. 
Durante sorumutu, INPEX aprezenta proposta hodi apoia dezenvolvimentu Greater Sunrise, inklui solusaun ba transporte no distribuisaun gás. Objetivu husi inisiativa sira ne’e atu promove dezevolvimentu enerjétiku no industriál iha Timor-Leste, hodi kria oportunidade ekonómika foun no empregu ba populasaun.
Ministru Agio Pereira subliña importánsia atu mantein diskusaun hirak ne’e no esplora posibidade hotu-hotu ne’ebé kontribui atu Timor-Leste bele hasai proveitu másimu husi ninia rekusus naturais, hodi hasa’e kreximentu ekonómiku no kriasaun empregu.
Husi fulan-abríl, empreza Wood Austrália hala’o estudu konseptuál ida kona-ba dezenvolvimentu kampu gás Greater Sunrise. Estudu ida-ne’e ho objetivu atu identifika opsaun di’ak liu ba dezenvolvimentu, prosesamentu no komersializasaun gás estraidu, ho konkluzaun ne’ebé prevee ona ba finál tinan ne’e nian..
Kampu gás Greater Sunrise lokaliza kuaze km 140 husi kosta súl Timor-Leste nian. Konsórsiu responsavel ba dezenvolvimentu kampu Greater Sunrise (Sunrise Joint Venture) kompostu husi TIMOR GAP, ne’ebé iha 56,6%, Woodside ho 33,44% no Osaka Gas Australia ho 10%.
Dezenvolvimentu Greater Sunrise no dada gazodutu ba kosta súl Timor-Leste nian hanesan prioridade nasionál, esensiál ba kreximentu no dezenvolvimentu ekonómiku país nian iha futuru. Governu sei kontinua atu avalia estratéjia sira ne’ebé di’ak liu ba dezenvolvimentu projetu ne’e, hodi asegura katak ida-ne’e bele avansa ho forma sustentavel no lori benefísiu boot ba nasaun no rejiaun.