Governu, liuhusi Konsellu Nasionál Seguransa no Soberania Alimentár no Nutrisionál (CONSSANTIL, akrónimu iha lian portugés), selebra Loron Mundiál Alimentasaun ho eventu ida iha auditóriu Ministériu Finansas nian, iha loron 18 fulan-outubru tinan 2024. Tinan ida-ne’e, tema globál maka “Direitu ba Alimentasaun ba Moris no ba Futuru ida ne’ebé Di’ak liu. Labele Husik Ema ida iha kotuk,” no Timor-Leste adota ona hanesan tema nasionál “Garante inkluzivamente timoroan sira-nia direitu ba ai-han ne’ebé nutritivu, ba Timor-Leste ida ne’ebé Prósperu.” 

Abertura ofisiál ba serimónia ne’e realiza husi Vise-Primeiru-Ministru no Ministru Koordenadór Asuntus Sosiais, Mariano Assanami Sabino, ne’ebé mós prezide CONSSANTIL. Marka prezensa iha serimónia ne’e maka reprezentantes korpu diplomátiku no organizasoins internasionais hanesan FAO, WFP, WHO, UNICEF, UNDP, no UNFPA, aleinde parseirus multilaterais no bilaterais hanesan Banku Mundiál, Komisaun Europeia, DFAT, USAID, JICA no KOICA.

Iha ninia diskursu, Vise-Primeiru-Ministru reafirma kompromisu Governu nian hodi kombate inseguransa ai-han no má nutrisaun, ho destaka implementasaun planus nasionais hanesan Planu Estratéjiku Dezenvolvimentu tinan 2011-2030 no Planu Nasionál Multisetoriál ba Kombate ‘Stunting’ (2024-2030). Salienta mós importánsia atu reforsa parseria, adota solusaun inovadora no serbisu ho koordenasaun ho ema hotu ne’ebé envolve hodi alkansa objetivu sira ne’e. 

Selebrasaun ne’e inklui semináriu ida, ne’ebé fahe ba sesaun prinsipál rua. Sesaun dahuluk ko’alia kona-ba tema hanesan disponibilizasaun ai-han nutritivu no transformasaun sistema agroalimentár hodi garante seguransa ai-han no nutrisaun ba ema hotu. Sesaun daruak ko’alia-liu kona-ba potensiál no estratéjia investimentu iha setór agríkola no direitu ema hotu nian ba ai-han.

Aprezentasaun sira ne’e aprezenta husi espesialista sira husi Ministériu Saúde, FAO no Ministériu Agrikultura, Pekuária, Peska no Florestas, ne’ebé ko’alia-liu kona-ba kestaun importante no dalan sira atu asegura seguransa ai-han ida ne’ebé sustentavel ba ema hotu. 

Vise-Primeiru-Ministru husik hela mensajen ida kona-ba uniaun no kooperasaun, hodi afirma katak “hamutuk, ita sei garante inkluzivamente timoroan sira-nia direitu ba ai-han ne’ebé nutritivu, hodi harii Timor-Leste ida ne’ebé prósperu ba ema hotu.”