Iha loron 14 fulan-outubru tinan 2024, Ministru Justisa, Sérgio de Jesus Fernandes da Costa Hornai, akompaña husi Diretór Polísia Sientífika Investigasaun Kriminál (PCIC – sigla iha lian portugés), Vicente Fernandes e Brito, hala’o sorumutu iha Lizboa ho reprezentantes Polísia Judisiária Portugál nian hodi hametin kooperasaun bilaterál entre instituisaun rua ne’e. 

Sorumutu ne’e ho objetivu prinsipál atu diskute estratéjia hodi hametin kolaborasaun iha área justisa nian, liu-liu iha setór investigasaun kriminál. Iha sorumutu ne’e, ko’alia kona-ba inisiativa hodi promove troka esperiénsia no téknika investigasaun nian, nune’e mós implementasaun ba inisiativa foun sira ne’ebé hamutuk hodi kombate krime transnasionál no krime organizadu. 

Fortalesimentu ba kooperasaun ida-ne’e sei permite atu hasa’e efisiénsia no kapasidade investigasaun PCIC Timor-Leste nian, hodi garante resposta ida ne’ebé efikás liu iha kombate krime organizadu no atividade kriminoza kompleksa sira seluk.

Ministru Sérgio Hornai afirma importánsia husi inisiativa sira hanesan ida-ne’e atu hametin relasaun bilaterál entre Timor-Leste no Portugál, hodi promove interkámbiu kona-ba koñesimentu no prátika di’ak sira entre país rua ne’e. Reforsu hosi kooperasaun institusionál sei kontribui ba dezenvolvimentu kontínuu PCIC nian no ba seguransa no estabilidade iha Timor-Leste.