Ministériu Justisa, reprezenta husi Diretór-Jerál Polítika Justisa, Honorio Aureliano Soares Magalhães, iha loron 14 fulan-outubru tinan 2024, hala’o sorumutu ho Institutu Rejistu no Notariadu Portugál (IRN) nian, iha Lizboa. Delegasaun timorense ne’e, liuhusi orientasaun Ministru Justisa, Sérgio de Jesus Fernandes da Costa Hornai, diskute inisiativa sira atu hametin servisu sira rejistu no notariadu nian iha Timor-Leste.

Objetivu prinsipál hosi sorumutu ne’e mak atu dezenvolve servisu rejistu notariál tuir lejizlasaun ne’ebé vigora no bazeia ba Planu Estratéjiku Dezenvolvimentu (PED) to’o tinan 2024, nune’e mós bazeia ba Planu Estratéjiku Kooperasaun entre Portugál no Timor-Leste (PEC, akrónimu iha Lian Portugés) ba períodu husi tinan 2024 to’o 2028, ne’ebé asina entre nasaun rua foin lalais ne’e. 

Durante sorumutu ne’e, Diretora-Jerál Polítika Justisa Portugál, Lídia Jacob, no Adjuntu Prezidente IRN nian, Jorge da Ponte, hato’o sira-nia vontade atu apoia inspesaun no avaliasaun ba atuasaun hosi konservadór no notáriu sira iha Timor-Leste, ho foku ba definisaun kritériu klasifikasaun nian no oferese formasaun kontínua. Diskute mós konsultoria posivel sira ba servisu rejistu no identifikasaun sivíl nian no kriasaun sistema dijitalizadu ida ba dadus rejistu no notariadu nian, ho objetivu atu fasilita arkivu ba dokumentu sira.

 Diretór-Jerál Polítika Justisa Timor-Leste nian destaka importánsia atu dezenvolve planu formasaun ida ba konservadór no notáriu sira, liuhosi semináriu no kursu ho durasaun badak, ne’ebé sei hala’o hamutuk hosi país rua, ne’ebé aliña ho akordu sira kooperasaun bilaterál nian.