Ministru Prezidénsia Konsellu Ministrus no Interlokutór Timor-Leste nian iha diskusaun sira kona-ba Projetu Greater Sunrise, Agio Pereira, hala’o ohin, loron 21 fulan-outubru 2024, video konferénsia ida ho Reprezentante Espesiál Austrália nian ba Projetu Greater Sunrise, Steve Bracks. Sorumutu ne’e ho objetivu atu halo pontu situasaun no fahe informasaun no hanoin iha ámbitu serbisu hamutuk entre Timor-Leste no Austrália ba dezenvolvimentu Greater Sunrise nian. Etapa sira tuirmai ne’ebé sei tuir mós diskute ona, ho objetivu atu maximiza benefísiu sira hosi projetu ba nasaun rua ne’e.

Durante vídeo konferénsia, Ministru Agio Pereira fahe ho Steve Bracks konkluzaun  sira hosi nia vizita foin lalais ne’e ba Brunei Darussalam, iha ne’ebé nia observa prátika ezemplár sira iha setór petróleu no gás no diversifikasaun ekonómika. 

Steve Bracks haktuir hikas kompromisu Governu Austrália nian hodi mantein kolaborasaun besik ho Timor-Leste iha dezenvolvimentu Projetu Greater Sunrise.

Durante enkontru ne’e, ko’alia mós kona-ba estudu konseituál projetu nian, ne’ebé hahú iha fulan-abril tinan 2024, ne’ebé lidera hosi empreza Wood Australia. Estudu ida-ne’e ho objetivu atu identifika opsaun sira ne’ebé di’ak liu ba dezenvolvimentu, prosesamentu no komersializasaun hosi gás ne’ebé hasai hosi Greater Sunrise, ne’ebé hein katak sei kompleta iha tinan ne’e nia rohan.

Kampu gás Greater Sunrise lokaliza maiz-ou-menus km 140 ba súl hosi tasi-ibun Timor-Leste nian. Greater Sunrise Field Development Consortium (Sunrise Joint Venture) forma hosi TIMOR GAP, ne’ebé kaer 56,6%, hamutuk ho Woodside, ne’ebé iha partisipasaun 33,44%, no Osaka Gas Australia, ho partisipasaun 10%.

Dezenvolvimentu Greater Sunrise, no kadoras mai ba kosta súl Timor-Leste nian, nu’udar prioridade nasionál ida no importante tebes ba kresimentu futuru no dezenvolvimentu ekonómiku Timor-Leste nian.