Ministru Komérsiu no Indústria Nino Pereira hala’o sorumutu ho Ministru Indústria Repúblika Indonézia Agus Gumiwang iha loron 30 Jullu 2024 iha Jakarta, Indonézia hodi ko’alia kona-ba hametin kooperasaun bilaterál entre Ministériu rua ne’e. Enkontru ne’e hala’o iha ámbitu ne’ebé amigavel tebes  no foka liu ba dezenvolve polítika ba parke industriál no promosaun agro-indústria iha Timor-Leste. 

Iha enkontru ne’e, Ministru Agus Gumiwang reafirma kompromisu Indonézia nian atu kontinua kooperasaun ne’ebé iha ona, hodi subliña importánsia atu dezenvolve kapasidade téknika sira. Ministru Indonézia fó sai mós medida sira hodi reforsa kolaborasaun ne’e, ne’ebé inklui oferta bolsa estudu no estájiu ba funsionáriu sira Ministériu Komérsiu no Indústria Timor-Leste nian, ho objetivu atu impulsiona formasaun no kapasitasaun iha área industriál. Aleinde ne’e, nia kompromete atu apoia kreximentu empreza industriál mikro, ki’ik no médiu sira hanesan parte ida hosi dezenvolvimentu ekonómiku rejiaun nian.

Ministru na’in rua ne’e konkorda atu kontinua serbisu tékniku no estratéjiku, hodi delega ba Diretór Jerál Ministériu rua ne’e responsabilidade atu kontinua ho enkontru tékniku hodi define planu asaun konkretu. Iha enkontru ne’e partisipa mós husi Asesór Embaixada RDTL, Domingos Sávio, no Adidu Komérsiu Timor-Leste iha Jakarta, Apolo J. Franca.