Primeiru-Ministru, Kay Rala Xanana Gusmão,iha loron 15 to loron 16 fulan-outubru, realiza vizita ofisiál ida ba illa Faial, ne’ebé situada iha estremu osidentál Grupu Sentrál arkipélagu Asores nian, ne’ebé simu hosi Prezidente Asembleia Lejizlativa Rejiaun Autónoma Asores, Luís Garcia,  no mós husi Prezidente Governu Rejionál Asores, José Manuel Bolieiro. Vizita ne’e ho nia objetivu atu hametin relasaun bilaterál no esplora oportunidade foun kooperaaun nian, liu-liu iha ámbitu ba ekonomia azúl no protesaun ba áreas tasi laran. 

Iha enkontru sira ho Luís Garcia no José Manuel Bolieiro, Primeiru-Ministru Xanana Gusmão subliña prioridades Governu Timor-Leste nian, hodi destaka importánsia husi Ekonomia Azúl ba dezenvolvimentu sustentavel nasaun. Durante reuniaun sira, diskuti mós kooperasaun iha área investigasaun sientífika no formasaun entre Asores no Timor-Leste, ne’ebé sei formaliza iha tempu badak, iha ne’ebé sei involve programa kapasitasaun tekniku timoroan sira nian iha Asores no haruka formadór sira asorianu nian mai Timor-Leste hodi fó apoiu dezenvolviementu ba tékniku lokál. 

Xefe Governu Timor-Leste nian espresa ninia satisfasaun no gratidaun ba disponibilidade Asores hodi fahe koñesimentu iha áreas siénsia tasi nian, biodiversidade no ambiente, konsidera hanesan prioridade ba Timor-Leste. Xanana Gusmão mós hateten ne’e hanesan  “ksolok boot ida” “ hodi hatene katak Asores, liliu Faial, ekipadu tebes ho kondisaun oioin hodi tulun ita hatene no implementa polítika prezervasaun oaseanu globál ida ne’e” 

Prezidente Governu Rejionál Asores, José Manuel Bolieiro, espresa ninia intensaun hodi formaliza protokolu kooperasaun ida entre Timor-Leste no Portugál, liu husi Asores, atu “dezenvolve parseria iha área oioin, ho énfaze ba ekonomia tasi no investigasaun sientífika ne’ebé lidera husi Universidade Asores”. Bolieiro mós hatutan tan katak susesu husi Asores “ iha investigasaun sientífika” liga ba peska no tasi okos”. 

Durante nia estadia, Primeiru-Ministru ho delegasaun timoroan sira vizita projetus ne’ebé ligadu ba ekonomia azúl, inklui Departementu Oseanugrafia no Peska iha Universidade Asores, institutu investigasaun Oseanu no Eskola kona-ba Tasi  iha Asores. Ne’ebé lokaliza hotu iha sidade Horta, kapitál lejizlativa Asores nian. 

Vizita ne’e mós inklui ho enkontru ida ho Prezidente Kámara Munisipál Horta, Carlos Ferreira, iha ne’ebé Primeiru-Ministru Xanana Gusmão hatoo ninia agradesimentu ba tulun ne’ebé fó husi povo asorianu hodi haruka ona materiál eskola nian ba Colégio Infante Sagres,iha Maliana ne’ebé harii husi padre asorianu Manuel Silveira Luís.

Komitiva ofisiál Timor-Leste nian kompostu husi Vise-Primeiru-Ministru, Francisco Kalbuadi Lay, Ministru Negósiu Estranjeiru no Kooperasaun, Bendito dos Santos Freitas, no Sekretáriu Estadu Komunikasaun Sosiál, Expedito Loro Dias Ximenes. Visita ne’e mós hetan prezensa husi Embaixadora Portugál iha Díli, Manuela Bairos, no mós  Embaixadora Timor-Leste ba Portugál, Isabel Guterres.