Vise-Primeiru-Ministru, Ministru Koordenadór Asuntus Sosiál no Ministru Dezenvolvimentu Rurál no Abitasaun Komunitária, Mariano Assanami Sabino, ofisalmente inaugura Festivál Fronteira tinan 2024, iha aldeia Oé-bau, Suku Kosta, Postu Administrativu Pante Makasar, Oekusi. Eventu ne’e, hala’o ho tema “Interkámbiu Kulturál atu hametin rekonsiliasaun”, nia subliña papél patrimóniu kulturál hodi promove unidade no rekonsiliasaun entre Timor-Leste no provínsia Nusa Tenggara Timur (NTT) Indonézia. 
Serimónia abertura ne’e marka prezensa husi membrus Governu, Parlamentu Nasionál, no konvidadus husi Timor-Leste no Indonézia. Iha nia diskursu, Vise-Primeiru-Ministru ko’alia importánsia husi festivál ne’e atu promove rekonsiliasaun liuhusi prátika kulturál tradisionál sira, hanesan soru tais, uma lisan, lia mate no lia moris. 
“Ita-nia objetivu atu transmite valór fraternidade, respeitu no dignidade nian husi jerasaun ba jerasaun. Festivál ida-ne’e hanesan biban ida atu restaura esénsia fraternidade umana”, afirma Mariano Assanami Sabino.
Aleinde aprezentasaun kulturál sira, festivál ne’e inklui semináriu no workshop ne’ebé foka ba hametin dame no rekonsiliasaun. Iha loron 15 fulan-outubru, Diretór Ezekutivu Sentru Nasionál Chega! I.P., Hugo Maria Fernandes, halo abertura workshop Arte ba amizade no rekonsiliasaun, ne’ebé halibur artista husi Timor-Leste no Indonézia hodi esplora forma atu promove dame liuhusi arte. 
Semináriu ho títulu Rekonsiliasaun hodi Hametin Dame no Demokrasia: Perspetiva Nasionál no Internasionál, hanesan atividade prinsipál ida husi festivál ne’e, ne’ebé partisipa husi oradór sira hanesan Vise-Primeiru-Ministru, Mariano Assanami Sabino, Ministru Juventude, Desportu, Artes e Kultura, Nelyo Isaac Sarmento, Prezidente Autoridade RAEOA, Rogério Tiago Lobato, no Abílio Dias Araújo.
Festivál Fronteira tinan 2024 ne’e sei hala’o to’o loron 18 fulan-outubru, ho programa abrajente ida ne’ebé inklui debate, vizita ba fatin istóriku, konsertu, expozisaun kulturál no lansamentu livru kona-ba estratéjia rekonsiliasaun no prezervasaun partimóniu kulturál hamutuk.