Ministériu Solidariedade Sosiál no Inkluzaun (MSSI), liuhusi Diresaun Nasionál Reinsersaun Komunitária, organiza semináriu sensibilizasaun ida kona-ba Lei Protesaun ba Labarik no Foin-sa’e sira iha Perigu, iha loron 11 fulan-outubru tinan 2024, iha postu Administrativu Lautein, Munisípiu Lautein. Semináriu ida-ne’e, ho tema “Garante Protesaun no Promosaun ba Labarik no Foin-sa’e sira iha Timor-Leste”, konta ho abertura ofisiál husi Vise-Ministra Solidariedade Sosiál no Inkluzaun, Céu Brite, ho ninia objetivu prinsipál atu reforsa promosaun direitu ba labarik no foin-sa’e sira, hodi alerta importánsia ba implementasaun efikás ba lei ida-ne’e hosi entidade kompetente sira. 
Lei Protesaun ba Labarik no Foin-sa’e sira iha Perigu, ne’ebé aprova hosi Parlamentu Nasionál iha loron 7 fulan-fevereiru tinan 2023 no promulga hosi Prezidente Repúblika iha loron 21 fulan-fevereiru tinan 2023, hanesan lei fundamentál ida hodi asegura direitu ba labarik sira iha área oioin, hanesan asesu ba edukasaun no saúde. Iha ninia intervensaun abertura, Vise-Ministra Céu Brites hateten katak “família mak fatin protesaun dahuluk ba labarik sira no iha responsabilidade prinsipál atu garante kumprimentu ba sira-nia direitu. Uainhira inan-aman sira la kumpre knaar ida-ne’e, konsekuénsia sei sente iha oan sira nia moris tomak.”
Iha eventu ne’e, Xefe Suku Parlamentu, Teovaldo Cesar da Silva, agradese ba MSSI ba inisiativa ne’e “hodi lori sosializasaun lei protesaun ba labarik no foin-sa’e sira ne’ebé iha perigu ba ita-nia komunidade, nune’e hodi fó dalan mai ita atu komprende no aplika ida-ne’e iha ita-nia moris loro-loron.” 
Semináriu ne’e konta ho prezensa husi autoridade lokál, reprezentantes liña ministeriál, lider komunitária, veteranu, profesór, estudante, membru Polísia Munisipiu Lautein, organizasaun naun-governamentál no komunidade lokál.
Aleinde sensibilizasaun kona-ba lei ida-ne’e, sesaun husu no hatán fó dalan ba komunidade atu hato’o sira-nia perguntas relasiona ho servisu ne’ebé MSSI fornese, liga ho apoiu sosiál no umanitáriu. 
Iha loron hanesan, Vise Ministru Céu Brites partisipa hodi entrega pensaun sosiál ba benefisiáriu idozu sira no akompaña rasik prosesu pagamentu ba faze datoluk tinan 2024 nian, ba idozu no ema ho defisiénsia, ne’ebé hala’o hela husi Banku Komersiál Nasionál Timor -Leste (BNCTL, Sigla iha lian portugés) iha Postu Administrativu Lautein. 