Sorumutu Konsellu Ministru loron 06 Outubru 2010
GOVERNU KONSTITUSIONÁL BA DA-IV
SEKRETARIA ESTADU KONSELLU MINISTRU
.............................................................................................................................................
KOMUNIKADU BA IMPRENSA
Sorumutu Konsellu Ministru loron 06 Outubru 2010
Konsellu Ministru hala’o sorumutu iha Kuarta ne’e, loron 06 Outubru 2010, iha ninia Sala Sorumutu, iha Palásiu Governu, Díli, no aprova:
1. Alterasaun da-rua ba Lei Estatutu Kombatente Libertasaun Nasionál sira nian
Governu Konstitusionál ba da-IV uluk koalia ona katak Kombatente Libertasaun Nasionál sira, nu’udar responsavel hirak prinsipal ba harí Estadu Timor-Leste nian, oras ne’e sente katak iha nesesidade atu kontribui ativu liu tan ba armonia sosiál no estabilidade polítika, hanesan kondisaun hirak kona-ba harí no haburas nasaun.
Alterasaun ba Lei n.º 3/2006, 12 Abril, ne’e kona-ba estrutura Konsellu Konsultivu Kombatente Libertasaun Nasionál nian sira. Espesifiku liu tan mak harí ona Konsellu Nasionál Veteranu sira nian hanesan orgaun úniku reprezentativu interese Kombatente Libertasaun Nasionál sira hotu nian. Sai mós nu’udar orgaun konsulta Governu nian iha asuntu hirak relasiona ho defeza interese veteranu sira nian ne’ebé mak hakerek iha Lei ne’e, nune’e mós iha Lei hirak koalia kona-ba Kombatente Libertasaun Nasionál nian.
2. Alterasaun da-uluk ba Dekretu Governu nian ne’ebé mak harí Komisaun Eventuál Verifikasaun Dadus nian sira hosi Períodu da-uluk Rejistu Kombatente Libertasaun Nasionál nian sira
Alterasaun ba Dekretu Governu nian n.º 1/2010, 18 Fevereiru, ne’e relasiona ho durasaun mandatu Komisaun Eventuál Verifikasaun Dadus nian hosi Periodu da-Uluk Rejistu Kombatente Libertasaun Nasionál nian, ne’ebé hala’o knar hodi fó validasaun ba dadus hirak relasiona ho pedidu rejistu atu hetan atribuisaun kona-ba kualidade Kombatente Libertasaun Nasionál nian.
Komisaun ida ne’e, ne’ebé ho natureza temporáriu no tenke remata ninia servisu sira iha loron 11 Dezembro 2010, tanba hetan dei’t loron 120 tuir estabelese nanis ona. Prorrogasaun ida ne’e mosu tandei’t komplesidade servisu nian ne’ebé hala’o hela no tanba hatama tarde alterasaun hirak ne’e iha Baze Dadus nian sira hosi servisu verifikasaun pedidu rejistu nian.
3. Alterasaun da-tolu ba Dekretu-Lei Pensaun ba Kombatente no Mártir Libertasaun Nasionál nian sira
Alterasaun Dekretu-Lei n.º 15/2008, 4 Jullu ida ne’e, koalia kona-ba situasaun hirak Kombatente Libertasaun Nasionál ne’e mate molok atu hahú ka remata prosesu rejistu iha entidade hirak kompetente ka molok atu hahú ka hala’o periodu rekerimentu Pensaun Espesiál Reforma nian ka Pensaun Espesiál Subsisténsia nian. Iha ne’ebá mós koalia kona-ba situasaun hirak ne’ebé mak Mártir Libertasaun Nasionál mate ona ka lakon tiha maibé la iha sertidaun sarani, ne’ebé mak halo ninia aman, inan ka maun-alin sira labele halo rekerimentu atu hetan pensaun sobrevivénsia nian hodi bazeia ba aprezentasaun sertidaun moris nian.
Konsellu Ministru mós analiza tiha ona:
1. Aprezsentasaun Pré-kualifikasaun ba Empreza hirak kaer Konstrusaun Sivil nian
Atu garante kualidade no seguransa konstrusaun hirak hala’o hela iha Timor-Leste, mak aprezenta tiha ona iha Konsellu Ministru proposta ida kona-ba pré-kualifikasaun ba Empreza Konstrusaun Sivil nian sira ne’ebé hala’o sira nia atividade iha Paíz ne’e. Projetu ne’ebé Ministériu Infraestrutura nian hato’o ne’e hakarak prevee projetu ida kona-ba Dekretu-Lei sertifikasaun no inskrisaun empreza konstrusaun nian sira no konsultoria téknika, nune’e mós ba rejistu no inskrisaun emprezáriu profisionál individuál hosi setór konstrusaun sivil nian sira. Hakarak mós atu hakiak meiu hirak ba haburas kapasidade téknika no finanseira empreza sira nian.
2. Medida hirak atu kombate hasoru konsumu klandestinu enerjia elétrika nian
Haree ba servisu atu fornese eletrisidade nian, ne’ebé mak hala’o hosi EDTL, to’o oras ne’e, sempre hatudu difikuldade balun bainhira atu kontinua ba oin, hodi hamosu susar oin-oin ba moris sidadaun sira nian, mak Konsellu Ministru analiza tiha ona forma oinsá atu rezolve problema ne’e.
Kapasidade EDTL oras ne’e atu hatán ba nesesidade komunidade sira nian hetan iha programa kona-ba konsumidór hira mak dada legalmente ahi. Ida ne’e hanesan fundamentál atu hetan dimensaun hosi servisu regular eletrisidade nian ho kondisaun hirak diak, ne’ebé mak rede ne’e fahe tuir númeru efetivu konsumidór sira nian.
