Timor-Leste hametin ninia prezensa no kooperasaun iha ámbitu Forum Kooperasaun Ekonómika no Komersiál entre Xina no Nasaun ho lian Portugues sira (Forum Makau), hodi hola parte iha atividade oi-oin ne’ebé realiza iha Makau durante fulan-outubru tinan 2024. Partisipasaun ida ne’e hanesan parte integrante ida husi esforsu kontínuu Timor-Leste nian atu hasa’e ninia relasaun ekonómika, kulturál no komersiál ho Xina no Nasaun luzófonu sira, hodi aproveita plataforma estratéjika ne’ebé oferese husi Forum Makau. 

Nune’e mós iha fin fulan setembru tinan 2024 nian, asina ona akordo jeminasaun (kaduak) entre Díli no Makau, ne’ebé marka prezensa husi Ministru Administrasaun Estatál, Tomás do Rosário Cabral, no Xefe Ezekutivu Rejiaun Administrativa Espesiál Makau nian (RAEM). Akordu ne’e marka pasu importante ida iha aprosimasaun Timor-Leste no Makau, hodi promove interkambiu ida klean liu no diversifikadu entre rejiaun rua ne’e.

Husi loron 10 to’o loron 12 fulan-outubru, Timor-Leste hetan ona reprezentasaun iha Kongresu dahuluk Arbritajen Luzófona nian, ne’ebé halibur espesialista no partisipante sira husi nasaun oi-oin hodi promove interkámbiu kultura jurídika no hametin papel Makau nian hanesan sentru arbitrajen. Besik pursentu 25 %husi partisipante sira mai husi nasaun sira ho lian portugués, no destaka importansia hosi enkontru ida ne’e ba komunidade luzófonu.

Timor-Leste sei marka mós prezensa iha Kolókiu kona-ba kooperasaun iha área Medisina Tradisional Xineza nian, ne’ebé sei hala’o husi loron 14 to’o loron 27 fulan-outubru tinan 2024. Eventu ida ne’e ho objetivu atu promove kooperasaun iha área rekursu umanu no edukasaun entre nasaun luzófonu sira, no halo parte iha programa atividade Forum Makau nian. 

 Pontu importante seluk husi partisipasaun Timor-Leste nian maka Feira Internasionál Makau ba da-29 nian (MIF), ne’ebe sei hala’o iha loron 15 to’o loron 19 fulan-outubru, iha ne’ebé nasaun ne’e, liu hosi TradeInvest Timor-Leste, sei promove nia oportunidade investimentu, hametin lasu komersiál no ekonómiku ho empreza xineza no luzófuna sira.

Husi loron 18 to’o loron 22 fulan-outubru, Timor-Leste sei sai hanesan destake iha Semana Kultura Xina no Nasaun sira ho lian Portugués ba dala16, ne’ebé sei realiza iha Docas dos Pescadores. Nasaun ne’e sei reprezenta husi artista koñesidu sira, hanesan pintora Maria Madeira, Banda Múzika Nabilan, no artezaun  Eliseu da Costa. Eventu ne’e sei selebra diversidade kulturál no patrimóniu riku ne’ebé fahe entre Xina no Nasaun Luzófonu sira, hodi promove entendimentu no kultura diálogu ne’ebé boot liu. 

Hahú husi loron 25 fulan-outubru, Timor-Leste sei partisipa iha Festivál Luzófona, hamutuk ho grupu dansa Lezi-val reprezenta kultura timoroan nian iha palku prinsipál. Festivál ida ne’e, sei konta ho artista 700 liu, promete sai hanesan eventu kulturál ida ne’ebé boot liu ba komunidade luzófona iha Makau.

Ikus liu, husi loron 29 fulan-outubru to’o loron 1 fulan-novembru, inspetór sira husi Banku Sentrál Timor-Leste sei partisipa iha Enkontru Anuál Seguru ba Nasaun sira ho Lian Portugués, ne’ebé organiza husi Autoridade Monetária Makau, hodi hametin interkambiu esperiensia no pratika diak sira iha setor seguradór.

 Ho inisiativa sira ne’e, Timor-Leste afirma fila fali ninia kompromissu ho kooperasaun Sino-Luzófona, uza Makau hanesan pontu ligasaun estratéjiku ida hodi promove interkámbiu ekonómiku, komersiál no kulturál ho nasaun luzófonu sira no Xina