Governu Timor-Leste no Governu Portugál, iha loron 14 fulan-outubru tinan 2024, asina Programa Estratéjiku Kooperasaun ba períodu 2024-2028, ne’ebé fó apoiu finanseiru ho euro millaun 75 (dolar amerikanu besik millaun 82). Programa ida ne’e ho objetivu atu reforsa relasaun bilaterál no kontribui ba Timor-Leste nia dezenvolvimentu sustentavel, liuhusi asaun lubun-ida iha área prioritária lima:  Dezenvolvimentu Umanu, Estadu Direitu no Governasaun Di’ak, Administrasaun Públika no Finansas Públikas, Juventude no Empregu, no  Oseanu, Sustentabilidade no Infraestruturas.

Durante serimónia ne’e, ne’ebé partisipa husi Primeiru-Ministru país rua ne’e, Kay Rala Xanana Gusmão no Luís Montenegro, asina mós akordu adisionál rua, ida kona-ba  reabilitasaun patrimóniu no ida seluk kona-ba Kooperasaun iha infraestruturas,  reforsa  mós kolaborasaun iha área enjeñeria sivíl, transporte, telekomunikasoins, enerjia no bee. Akordu sira-ne’e ho objetivu atu promove modernizasaun Timor-Leste no apoia kreximentu ekonómiku país nian. 

Primeiru-Ministru Xanana Gusmão, durante konferénsia imprensa, subliña importánsia husi kooperasaun ne’e, “liuliu atu konsolida konstrusaun Estadu” no ba formasaun ne’ebé “sei tulun Timór hodi fó ba foin-sa’e timoroan sira”, ne’ebé permite hodi garante “seguransa iha  konstrusaun nasaun nian, liuhosi ekonomia ida ne’ebé sustentável”.

Xefe Governu afirma mós katak tanba Timor-Leste hanesan “país foun ida”, nafatin ho “difikuldade barak” no “dezafiu barak”, sura “ho Portugál nia solidariedade ne’ebé prontu”, “hodi fó dalan ba Governu, ka instituisaun sira Estadu, atu ita bele serbisu ba timoroan nia moris-nia di’ak” no atu “kria kondisaun ba labarik no foin-sa’e timoroan sira”. 

Luís Montenegro, Primeiru-Ministru Portugál nian, afirma katak asinatura hosi akordu sira ne’e reflete “relasaun amizade, solidariedade, kooperasaun ne’ebé labele kotu” entre país rua ne’e. Montenegro mós destaka katak “hanesan reforsu ida ne’ebé Portugál dezenvolve hodi tulun Timor-Leste iha konkista barak ne’ebé harii Estadu foun, modernu, efisiente, kona-ba servisu ne’ebé presta ba povu”. Governante ne’e fó sai mós katak sei vizita Timor-Leste iha fulan-juñu tinan 2025, tanba konvite hosi Xanana Gusmão. 

Programa Estratéjiku Kooperasaun 2024-2028 ne’e asina husi Ministru Negósius Estranjeirus no Kooperasaun Timor-Leste, Bendito dos Santos Freitas, no Ministru Estadu no Negósius Estranjeirus Portugál, Paulo Rangel. Akordu Kooperasaun iha Área Infraestruturas ne’e asina husi Ministru Negósiu Estranjeiru na’in rua no Ministru Planeamentu Estratéjiku no Investimentu Timor-Leste, Gastão de Sousa. Ikus-liu, Protokolu Kooperasaun ba Dezenvolvimentu Programa Revive ne’e asina husi Vise-Primeiru-Ministru no Ministru Koordenadór Asuntu Ekonómiku no Turizmu no Ambiente Timor-Leste, Francisco Kalbuadi Lay, no husi Ministru Ekonomia Portugál, Pedro Reis . 

Vizita ofisiál Primeiru-Ministru Timor-Leste ba Portugál, ne’ebé hala’o husi loron 12 to’o 18 fulan-outubru tinan 2024, inklui mós audiénsia ida ho Prezidente Repúblika Portugál, Marcelo Rebelo de Sousa, no sei iha mós sorumutu ho altu reprezentante sira hosi Governu no Asembleia Repúblika nian, no mós vizita ida ba Rejiaun Autónoma Azores, iha ne’ebé Xanana Gusmão sei vizita projetu sira ne’ebé iha relasaun ho ekonomia azul.