Iha loron 12 fulan-outubru tinan 2024, Primeiru Ministru Kay Rala Xanana Gusmão hahú ninia vizita ofisiál ba Portugál, hafoin partisipa iha Simeira ASEAN ba dala 44 no 45 iha Laos. Vizita ofisiál ida-ne’, sei hala’o to’o loron 18 fulan-outubru, ho objetivu atu hametin relasaun bilaterál entre Timor-Leste no Portugál, ne’ebé sei haree liu ba-iha área estratéjika sira hanesan edukasaun, justisa, seguransa no kooperasaun ekonómika.

Uainhira to’o iha Lizboa, Primeiru Ministru simu husi Embaixadora Portugál nian iha Timor-Leste, Manuela Bairos,  Embaixadora Timor-Leste iha Portugál, Isabel Guterres, no Embaixadora Timor-Leste iha Komunidade País Lian-Portuguesa (CPLP), Laura Abrantes.

Durante ninia vizita, Xefe Governu Timor-Leste sei iha enkontru ho Prezidente Repúblika Portugal, Marcelo Rebelo de Sousa, Prezidente Asembleia Repúblika, Pedro Aguiar-Branco, no Primeiru-Ministru Portugál, Luís Montenegro. 

Momentu prinsipál ida husi vizita ne’e maka asinatura Programa Estratéjiku Kooperasaun entre Timor-Leste no Portugál ba períodu tinan 2024 to’o 2028, ne’ebé foka liu ba área prinsipál lima: Dezenvolvimentu Umanu, Estadu Direitu no Governasaun Di’ak, Administrasaun Públika no Ekonomia, Juventude no Empregu, no Oseanu no Sustentabilidade. Akordu kooperasaun ne’e sei inklui medida hirak ne’ebé ho objetivu atu hasa’e edukasaun no saúde, modernizasaun administrasaun públika, promosaun justisa no governasaun di’ak, insentiva emprendedorizmu foin-sa’e no protesaun ambientál. Prevee mós akordu adisionál ne’ebé relasiona ho infraestrutura no turizmu, hodi subliña kompromisu kontínuu husi país rua ne’e hodi hakle’an sira-nia relasaun bilaterál. 

Vizita ne’e inklui mós enkontru ida ho Sekretáriu Ezekutivu CPLP no reprezentantes Estadu-Membru organizasaun multilaterál ida-ne’e. Primeiru-Ministru mós sei iha oportunidade atu hasoru malu ho komunidade timoroan sira ne’ebé hela iha Portugál, akadémiku portugeza no ho membru sosiedade sivíl sira.

Konvite husi Governu Rejionál  Asores, Kay Rala Xanana Gusmão, sei vizita illa Faial, iha Asores, hodi buka hatene projetu hirak ne’ebé relasiona ho ekonomia azúl, área boot ida ne’ebé interesante tebes ba Timor-Leste, ho objetivu atu promove dezenvolvimentu sustentável rekursu tasi nian no atu diversifika ekonomia nasionál. 

Iha vizita ofisiál ne’e, Primeiru-Ministru akompaña husi membrus Governu Timor-Leste, hanesan Ministru Negósius Estranjeiru no Kooperasaun, Bendito dos Santos Freitas, Ministru Interiór, Francisco da Costa Guterres, Ministra Edukasaun, Dulce de Jesus Soares, Ministru Justisa, Sérgio de Jesus Fernandes da Costa Hornai, Ministru Ensinu Superiór, Siénsia no Kultura, José Honório da Costa Pereira Jerónimo, Sekretáriu Estadu Komunikasaun Sosiál, Expedito Dias Ximenes, no Adidu Defeza Timor-Leste iha Portugál, Koronel Coronel Mário Batista “Bersama”, no mós ekipa téknika sira.